ന്യൂഡൽഹി: പശ്ചിമ ബംഗാൾ നിയമസഭാ തെരഞ്ഞെടുപ്പിന് മുന്നോടിയായി നടന്ന വോട്ടർ പട്ടിക പുതുക്കലിൽ വ്യാപക ക്രമക്കേട് നടന്നെന്ന ആരോപണവുമായി തൃണമൂൽ കോൺഗ്രസ് സുപ്രീം കോടതിയിൽ. പട്ടികയിൽ നിന്ന് 90.8 ലക്ഷം പേരെ മാറ്റിയത് തെരഞ്ഞെടുപ്പ് ഫലത്തെ അട്ടിമറിച്ചെന്ന് തൃണമൂൽ എംപിയും അഭിഭാഷകനുമായ കല്യാൺ ബാനർജി വാദിച്ചു. ബിജെപി ആദ്യമായി അധികാരത്തിലെത്തിയ തെരഞ്ഞെടുപ്പിന് പിന്നാലെയാണ് ഈ നിർണായക നീക്കം.(TMC Challenges West Bengal Election Result In Supreme Court Over Voter List Deletion)
മുൻപ് തൃണമൂൽ ജയിച്ചിരുന്ന 31 മണ്ഡലങ്ങളിൽ ഇത്തവണ ബിജെപി ജയിച്ചത് വോട്ടർമാരെ കൂട്ടത്തോടെ ഒഴിവാക്കിയത് കാരണമാണെന്ന് പാർട്ടി ആരോപിക്കുന്നു. ഈ മണ്ഡലങ്ങളിലെ ബിജെപി സ്ഥാനാർത്ഥികളുടെ ഭൂരിപക്ഷത്തേക്കാൾ വലിയ സംഖ്യയാണ് പട്ടികയിൽ നിന്ന് നീക്കം ചെയ്യപ്പെട്ട വോട്ടർമാരുടേത്.
വോട്ടർ പട്ടികയിൽ പേര് ചേർക്കാൻ നൽകിയ 35 ലക്ഷത്തോളം അപേക്ഷകൾ ഇലക്ഷൻ കമ്മീഷൻ പരിഗണിച്ചിട്ടില്ല. തൃണമൂലും ബിജെപിയും തമ്മിലുള്ള വോട്ട് വ്യത്യാസം 32 ലക്ഷം മാത്രമാണെന്നിരിക്കെ, ഈ അപേക്ഷകൾ ഫലത്തെ നേരിട്ട് ബാധിക്കുമായിരുന്നുവെന്ന് ഹർജിയിൽ പറയുന്നു. ഒരു മണ്ഡലത്തിൽ തൃണമൂൽ സ്ഥാനാർത്ഥി 862 വോട്ടിന് പരാജയപ്പെട്ടപ്പോൾ അവിടെ 5,000 വോട്ടർമാരെയാണ് പട്ടികയിൽ നിന്ന് പുറത്താക്കിയത്.
തൃണമൂലിന്റെ വാദങ്ങൾ അടിസ്ഥാനരഹിതമാണെന്ന് തെരഞ്ഞെടുപ്പ് കമ്മീഷൻ സുപ്രീം കോടതിയിൽ വ്യക്തമാക്കി. വോട്ടർമാരെ ഏറ്റവും കൂടുതൽ ഒഴിവാക്കിയ മാൾഡ, മുർഷിദാബാദ് തുടങ്ങിയ മേഖലകളിലും തൃണമൂൽ തന്നെയാണ് വിജയിച്ചതെന്ന് കമ്മീഷൻ ചൂണ്ടിക്കാട്ടി. സുജാപൂർ, രഘുനാഥ്ഗഞ്ച് തുടങ്ങിയ മണ്ഡലങ്ങളിലെ വിജയം ഉദാഹരിച്ചാണ് കമ്മീഷൻ ഈ വാദത്തെ പ്രതിരോധിച്ചത്.
Story Summary
The Trinamool Congress has moved the Supreme Court alleging that the removal of 90.8 lakh voters from the West Bengal electoral roll led to its defeat in 31 key seats. While the party claims the election result was skewed, the Election Commission countered by highlighting that TMC won in constituencies with the highest voter deletions.
