Follow on Google News
ടോക്കിയോ: ജപ്പാൻ തലസ്ഥാനമായ ടോക്കിയോയിലെ ഉയർന്ന ജീവിതച്ചെലവിനെക്കുറിച്ചുള്ള ഒരു ഇന്ത്യൻ യുവതിയുടെ വെളിപ്പെടുത്തൽ സോഷ്യൽ മീഡിയയിൽ വലിയ ചർച്ചയാകുന്നു (Tokyo Cost of Living Indian Woman). ടോക്കിയോയിൽ താമസിക്കുന്ന സുനാക്ഷി ശർമ്മ എന്ന യുവതിയാണ് തന്റെ മൂന്നംഗ കുടുംബത്തിന്റെ പ്രതിമാസ ചെലവ് ഏകദേശം 2.9 ലക്ഷം രൂപ (5,00,000 യെൻ) ആണെന്ന് വെളിപ്പെടുത്തിയത്. ഈ തുക ഇന്ത്യൻ നഗരങ്ങളിലെ ജീവിതച്ചെലവുമായി താരതമ്യം ചെയ്തുകൊണ്ടുള്ള ചർച്ചകൾക്കാണ് വീഡിയോ വഴിതുറന്നത്.
യുവതി പങ്കുവെച്ച കണക്കുകൾ പ്രകാരം വീട്ടുവാടകയ്ക്കും മറ്റ് അനുബന്ധ സൗകര്യങ്ങൾക്കുമായി മാത്രം പ്രതിമാസം 2,00,000 യെൻ (ഏകദേശം 1.16 ലക്ഷം രൂപ) ചെലവാകുന്നുണ്ട്. കുട്ടിയുടെ ഡേകെയർ ഫീസായി 1,00,000 യെൻ (ഏകദേശം 58,000 രൂപ) നൽകണം. ഭക്ഷണത്തിനായി, പ്രത്യേകിച്ച് ഇന്ത്യൻ പലചരക്ക് സാധനങ്ങൾക്കായി 1,00,000 മുതൽ 1,50,000 യെൻ വരെ (58,000 മുതൽ 87,000 രൂപ വരെ) ആവശ്യമാണ്. ജപ്പാനിൽ ഇന്ത്യൻ വിഭവങ്ങൾക്കും ചേരുവകൾക്കും വലിയ വില നൽകേണ്ടി വരുന്നുണ്ടെന്നും ഇവർ ചൂണ്ടിക്കാട്ടി. കൂടാതെ വാഹന സംബന്ധമായ ചെലവുകൾക്കായി 50,000 മുതൽ 1,00,000 യെൻ വരെ വേറെയും വേണം.
ഇന്ത്യൻ സാഹചര്യത്തിൽ ഈ തുക വളരെ കൂടുതലാണെന്ന് ചിലർ അഭിപ്രായപ്പെട്ടപ്പോൾ, ടോക്കിയോയിലെ വരുമാനവും ജീവിതനിലവാരവും വെച്ച് നോക്കുമ്പോൾ ഇത് സ്വാഭാവികമാണെന്ന് മറ്റ് ചിലർ വാദിച്ചു. ടോക്കിയോയെപ്പോലെയുള്ള ഒരു നഗരത്തിൽ കാർ ഉപയോഗിക്കുന്നതും നഗരമധ്യത്തിൽ താമസിക്കുന്നതും ചെലവ് വർദ്ധിപ്പിക്കുമെന്ന് ചിലർ ചൂണ്ടിക്കാട്ടി. അതേസമയം, മുംബൈ പോലുള്ള ഇന്ത്യൻ നഗരങ്ങളിലെ ഉയർന്ന നിലവാരമുള്ള സ്ഥലങ്ങളിലും ഇതിനോട് തുല്യമായ വാടകയാണ് ഇപ്പോൾ ഈടാക്കുന്നതെന്ന് ചിലർ നിരീക്ഷിച്ചു. വിദേശജീവിതം പലപ്പോഴും പുറമെ നിന്ന് കാണുന്നത് പോലെ ആഡംബരമല്ലെന്നും നിത്യജീവിതത്തിനായുള്ള ഉയർന്ന ചെലവ് വലിയ വെല്ലുവിളിയാണെന്നും ഈ വീഡിയോ ഓർമ്മിപ്പിക്കുന്നു.
View this post on Instagram
