ബെയ്റൂട്ട്: ലബനനിൽ ഹിസ്ബുള്ളയുടെ എല്ലാവിധ സൈനിക പ്രവർത്തനങ്ങളും ഉടനടി നിരോധിക്കാനുള്ള സർക്കാർ തീരുമാനം അന്തിമമാണെന്ന് പ്രസിഡന്റ് മിഷേൽ ഔൺ പ്രഖ്യാപിച്ചു (Lebanon Ban Hezbollah Military Activity). ഈ തീരുമാനത്തിൽ നിന്ന് പിന്നോട്ടില്ലെന്നും ഹിസ്ബുള്ള തങ്ങളുടെ പക്കലുള്ള എല്ലാ ആയുധങ്ങളും ഉടൻ തന്നെ ലബനൻ സർക്കാരിന് കൈമാറണമെന്നും അദ്ദേഹം ഉത്തരവിട്ടു. യുദ്ധം ചെയ്യണോ സമാധാനം വേണോ എന്ന് തീരുമാനിക്കാനുള്ള ഏക അധികാരം ലബനൻ ഭരണകൂടത്തിന് മാത്രമായിരിക്കുമെന്നും അദ്ദേഹം തന്റെ പ്രസ്താവനയിലൂടെ വ്യക്തമാക്കി. എക്സിൽ പങ്കുവെച്ച കുറിപ്പിലൂടെയാണ് രാജ്യം നേരിടുന്ന ഈ നിർണ്ണായക സന്ധിയിൽ സൈനിക നിയന്ത്രണം പൂർണ്ണമായും സർക്കാരിൽ നിക്ഷിപ്തമാക്കുമെന്ന് അദ്ദേഹം ഉറപ്പിച്ചു പറഞ്ഞത്.
ഇസ്രായേൽ അതിർത്തിയിൽ സംഘർഷം വീണ്ടും രൂക്ഷമായ സാഹചര്യത്തിലാണ് ലബനൻ ഇത്തരമൊരു കടുത്ത തീരുമാനത്തിലേക്ക് നീങ്ങിയത്. 2024 നവംബറിൽ ഉണ്ടാക്കിയ വെടിനിർത്തൽ കരാർ ഇസ്രായേൽ ലംഘിക്കുന്നു എന്ന് ആരോപിച്ച് ഹിസ്ബുള്ള ഇസ്രായേലിന് നേരെ റോക്കറ്റ് ആക്രമണം നടത്തിയിരുന്നു. ഇറാനെതിരെ അമേരിക്കയും ഇസ്രായേലും നടത്തുന്ന യുദ്ധത്തിന് തിരിച്ചടിയായാണ് തങ്ങൾ ആക്രമണം നടത്തുന്നതെന്നാണ് ഹിസ്ബുള്ളയുടെ അവകാശവാദം.
പശ്ചിമേഷ്യയിലെ യുദ്ധം കൂടുതൽ മേഖലകളിലേക്ക് പടരുന്നത് ലബനനിലുള്ള മലയാളി പ്രവാസികളെയും അവരുടെ കുടുംബങ്ങളെയും വലിയ ഭീതിയിലാഴ്ത്തിയിട്ടുണ്ട്. ഇതിനോടകം തന്നെ 15 ഗൾഫ് രാജ്യങ്ങളിൽ നിന്ന് അമേരിക്കൻ പൗരന്മാരോട് ഉടൻ മടങ്ങാൻ യുഎസ് സ്റ്റേറ്റ് ഡിപ്പാർട്ട്മെന്റ് നിർദ്ദേശം നൽകിയതും, ലബനൻ അതിർത്തിയിൽ നിന്ന് സൈന്യം പിൻവാങ്ങിയതും സ്ഥിതിഗതികൾ വഷളാക്കുന്നു. സമാധാന ചർച്ചകൾക്കായി ഫ്രാൻസും ചൈനയും ശ്രമിക്കുന്നുണ്ടെങ്കിലും യുദ്ധമുഖത്ത് ആക്രമണം തുടരുകയാണ്.
