പ്യോങ്യാങ്: റഷ്യയുടെ പരമാധികാരവും സുരക്ഷയും സംരക്ഷിക്കാനുള്ള എല്ലാ നീക്കങ്ങൾക്കും ഉത്തരകൊറിയയുടെ പൂർണ്ണ പിന്തുണ തുടരുമെന്ന് ഭരണാധികാരി കിം ജോങ് ഉൻ (Kim Jong Un Russia Support). യുക്രെയ്ൻ അധിനിവേശത്തിൽ റഷ്യൻ പക്ഷത്ത് ചേർന്ന് പോരാടി വീരമൃത്യു വരിച്ച ഉത്തരകൊറിയൻ സൈനികർക്കായി നിർമ്മിച്ച സ്മാരകത്തിന്റെ ഉദ്ഘാടന ചടങ്ങിലാണ് കിം ഇക്കാര്യം വ്യക്തമാക്കിയത്.
റഷ്യയിലെ കുർസ്ക് മേഖലയിൽ നടന്ന പോരാട്ടത്തിൽ കൊല്ലപ്പെട്ട ഉത്തരകൊറിയൻ സൈനികരുടെ ഓർമ്മയ്ക്കായി പ്യോങ്യാങ്ങിലാണ് സ്മാരകം പണിതത്. റഷ്യൻ പ്രതിരോധ മന്ത്രി ആൻഡ്രി ബെലൂസോവ് ചടങ്ങിൽ പങ്കെടുത്തു. ഏകദേശം 14,000 ഉത്തരകൊറിയൻ സൈനികരെയാണ് റഷ്യ യുദ്ധത്തിനായി നിയോഗിച്ചിരുന്നത്. ഇതിൽ 6,000-ത്തിലധികം സൈനികർ കൊല്ലപ്പെട്ടതായാണ് ദക്ഷിണ കൊറിയൻ, യുക്രെയ്ൻ രഹസ്യാന്വേഷണ ഏജൻസികളുടെ റിപ്പോർട്ട്. 2027 മുതൽ 2031 വരെയുള്ള അഞ്ച് വർഷത്തെ സൈനിക സഹകരണ കരാറിൽ ഒപ്പിടാൻ ഇരുരാജ്യങ്ങളും തീരുമാനിച്ചു. യുക്രെയ്ൻ യുദ്ധത്തിന് ശേഷവും റഷ്യയുമായുള്ള സൈനിക-സാമ്പത്തിക ബന്ധം ശക്തമായി നിലനിർത്താനാണ് കിം ജോങ് ഉൻ ലക്ഷ്യമിടുന്നത്.
അമേരിക്കയുടെയും പാശ്ചാത്യ രാജ്യങ്ങളുടെയും അധിനിവേശ മോഹങ്ങളെ തടയാൻ ഉത്തരകൊറിയൻ സൈനികരുടെ ബലിദാനം സഹായിച്ചുവെന്ന് കിം പറഞ്ഞു. റഷ്യയിൽ കൊല്ലപ്പെട്ട സൈനികരെ രാജ്യത്തിന്റെ വീരനായകന്മാരായി സർക്കാർ പ്രഖ്യാപിച്ചു. റഷ്യയിൽ നിന്ന് അത്യാധുനിക സൈനിക സാങ്കേതിക വിദ്യയും സാമ്പത്തിക സഹായവും ഉറപ്പാക്കാനാണ് ഉത്തരകൊറിയൻ ഭരണകൂടം ഈ നീക്കങ്ങളിലൂടെ ശ്രമിക്കുന്നത്.
Summary: North Korean leader Kim Jong Un reaffirmed full support for Russia’s policies and inaugurated a memorial for North Korean soldiers killed in Russia’s Kursk region. An estimated 14,000 North Korean troops fought alongside Russian forces, with over 6,000 reportedly killed. During a meeting with Russian Defence Minister Andrei Belousov, both nations agreed on a long-term military cooperation plan (2027–2031), signaling a partnership that extends beyond the Ukraine war. Kim hailed the fallen soldiers as symbols of sacrifice against Western “hegemony.”
