റാമല്ല: അധിനിവേശ വെസ്റ്റ് ബാങ്കിലെ റാമല്ലയ്ക്ക് വടക്കുകിഴക്കുള്ള അബു ഫലാഹ് ഗ്രാമത്തിൽ ഇസ്രായേൽ കുടിയേറ്റക്കാർ നടത്തിയ വെടിവയ്പ്പിൽ രണ്ട് പലസ്തീനികൾ കൊല്ലപ്പെട്ടു (Israeli Settler Attack West Bank). ഫാരെ ജവ്ദത്ത് ഹമായേൽ (57), തായർ ഫാറൂഖ് ഹമായേൽ (24) എന്നിവരാണ് കൊല്ലപ്പെട്ടതെന്ന് പലസ്തീൻ ആരോഗ്യ മന്ത്രാലയം അറിയിച്ചു. ഇരുവരുടെയും തലയ്ക്കാണ് വെടിയേറ്റത്. ആക്രമണത്തെ പ്രതിരോധിക്കാൻ ശ്രമിച്ച ഗ്രാമവാസികളെ തുരത്താൻ ഇസ്രായേൽ സൈന്യം പ്രയോഗിച്ച കണ്ണീർവാതക ഷെൽ തറച്ച് മുഹമ്മദ് ഹസൻ മുറ (55) എന്നയാളും പിന്നീട് മരണപ്പെട്ടു.
ഇറാനെതിരെയുള്ള ഇസ്രായേൽ-അമേരിക്കൻ സൈനിക നീക്കങ്ങൾക്കിടയിൽ വെസ്റ്റ് ബാങ്കിലെ ഗ്രാമപ്രദേശങ്ങളിൽ ഇസ്രായേൽ കുടിയേറ്റക്കാർ ആക്രമണം കടുപ്പിച്ചിരിക്കുകയാണ്. കഴിഞ്ഞ ഒരാഴ്ചയ്ക്കുള്ളിൽ മാത്രം കുടിയേറ്റക്കാരുടെ ആക്രമണത്തിൽ ആറ് പലസ്തീനികൾ കൊല്ലപ്പെട്ടതായി വാഫ വാർത്താ ഏജൻസി റിപ്പോർട്ട് ചെയ്യുന്നു. 2023 ഒക്ടോബറിൽ ഗാസ യുദ്ധം ആരംഭിച്ചതിനുശേഷം വെസ്റ്റ് ബാങ്കിൽ ഇസ്രായേൽ സൈന്യമോ കുടിയേറ്റക്കാരോ നടത്തിയ ആക്രമണങ്ങളിൽ ആയിരത്തിലധികം ഫലസ്തീനികൾ കൊല്ലപ്പെട്ടതായാണ് കണക്കുകൾ സൂചിപ്പിക്കുന്നത്.
Summary: Three Palestinians were killed in an attack by Israeli settlers and military intervention in the village of Abu Falah, West Bank.
