ടെഹ്റാൻ: ഇറാന്റെ ഔദ്യോഗിക വാർത്താ ഏജൻസിയായ ഐആർഐബി (IRIB) ആസ്ഥാനത്തിന് നേരെ അമേരിക്കയുടെയും ഇസ്രായേലിന്റെയും ശക്തമായ വ്യോമാക്രമണം ഉണ്ടായതായി ഇറാന്റെ ഔദ്യോഗിക മാധ്യമമായ ഇസ്ന (ISNA) സ്ഥിരീകരിച്ചു (Iran IRIB Headquarters Attacked). ടെഹ്റാനിലെ ഐആർഐബി ആസ്ഥാനത്തിന്റെ ചില ഭാഗങ്ങൾ തകർന്നതായാണ് റിപ്പോർട്ട്. എന്നാൽ, മുൻകരുതൽ നടപടികൾ സ്വീകരിച്ചിരുന്നതിനാൽ വാർത്താ സംപ്രേക്ഷണത്തെ ഇത് ബാധിച്ചിട്ടില്ലെന്നും പ്രവർത്തനം തുടരുകയാണെന്നും അധികൃതർ അറിയിച്ചു.
ഇന്ന് പുലർച്ചെ ടെഹ്റാനിലെ വിവിധയിടങ്ങളിൽ ഉണ്ടായ സ്ഫോടനങ്ങളിൽ നഗരത്തിന്റെ മധ്യഭാഗവും വടക്കൻ, പടിഞ്ഞാറൻ മേഖലകളും കുലുങ്ങി. ടെഹ്റാൻ ഡൗൺടൗണിലെ വാലി അസർ, ഇമാം ഖുമൈനി സ്ട്രീറ്റുകൾക്ക് സമീപമുള്ള ഷാഹിദ് മൊത്താരി ഗവൺമെന്റ് കോംപ്ലക്സും ആക്രമണത്തിൽ ലക്ഷ്യമിട്ടു. ഇറാൻ പരമോന്നത നേതാവ് ഖമേനിയുടെ വധത്തിന് പിന്നാലെ ടെഹ്റാനിലെ രഹസ്യാന്വേഷണ ആസ്ഥാനം തകർത്തതിന് തൊട്ടുപിന്നാലെയാണ് ഇറാന്റെ ആശയവിനിമയ സംവിധാനങ്ങളെ തകർക്കാൻ ലക്ഷ്യമിട്ട് പുതിയ ആക്രമണം ഉണ്ടായത്.
