ദുബായ്: പശ്ചിമേഷ്യൻ യുദ്ധത്തിന്റെ പശ്ചാത്തലത്തിൽ സോഷ്യൽ മീഡിയയിലൂടെ തെറ്റിദ്ധരിപ്പിക്കുന്നതും വ്യാജവുമായ ദൃശ്യങ്ങൾ പ്രചരിപ്പിച്ച 19 ഇന്ത്യക്കാർ ഉൾപ്പെടെ 35 പേരെ അറസ്റ്റ് ചെയ്യാൻ യുഎഇ ഉത്തരവിട്ടു (Fake AI Videos UAE Arrests). പൊതുജനങ്ങളിൽ ഭീതി പടർത്തുന്ന രീതിയിൽ ആർട്ടിഫിഷ്യൽ ഇന്റലിജൻസ് ഉപയോഗിച്ച് നിർമ്മിച്ച വ്യാജ വീഡിയോകളും തെറ്റായ വിവരങ്ങളും പങ്കുവെച്ചതിനാണ് നടപടി.
പ്രതികൾക്കെതിരെയുള്ള കുറ്റങ്ങൾ
പിടിക്കപ്പെട്ടവരെ മൂന്ന് വിഭാഗങ്ങളിലായാണ് യുഎഇ അറ്റോർണി ജനറൽ ഡോ. ഹമദ് സെയ്ഫ് അൽ ഷംസി തരംതിരിച്ചിരിക്കുന്നത്:
- മിസൈൽ വിക്ഷേപണ ദൃശ്യങ്ങൾ: രാജ്യത്തിന്റെ ആകാശത്ത് മിസൈലുകൾ തടയുന്നതിന്റെ യഥാർത്ഥ ദൃശ്യങ്ങൾ പകർത്തി, ഭീതി പടർത്തുന്ന തരത്തിലുള്ള ശബ്ദരേഖകൾ ചേർത്ത് പ്രചരിപ്പിച്ചു. ഇത് രാജ്യത്തിന്റെ പ്രതിരോധ രഹസ്യങ്ങൾ ശത്രുക്കൾക്ക് ചോർന്നുകിട്ടാൻ കാരണമായേക്കാം.
- AI ഉപയോഗിച്ചുള്ള വ്യാജ ദൃശ്യങ്ങൾ: യുഎഇയിലെ പ്രമുഖ കെട്ടിടങ്ങൾക്ക് നേരെ ആക്രമണം നടന്നുവെന്നും തീപിടുത്തമുണ്ടായെന്നും തോന്നിപ്പിക്കുന്ന തരത്തിൽ AI ഉപയോഗിച്ച് നിർമ്മിച്ച വീഡിയോകൾ പങ്കുവെച്ചു. മറ്റു രാജ്യങ്ങളിലെ പഴയ വീഡിയോകൾ യുഎഇയിലേതാണെന്ന രീതിയിലും ഇവർ പ്രചരിപ്പിച്ചു.
-
ശത്രുരാജ്യത്തെ പുകഴ്ത്തൽ: ഇറാൻ നടത്തുന്ന സൈനിക നീക്കങ്ങളെയും അവരുടെ നേതൃത്വത്തെയും പുകഴ്ത്തിക്കൊണ്ട് യുഎഇയുടെ ദേശീയ താല്പര്യങ്ങൾക്ക് വിരുദ്ധമായ രീതിയിൽ പ്രചാരണം നടത്തി.
യുഎഇ നിയമപ്രകാരം ഇത്തരം കുറ്റകൃത്യങ്ങളിൽ ഏർപ്പെടുന്നവർക്ക് കുറഞ്ഞത് ഒരു വർഷം തടവും ഒരു ലക്ഷം ദിർഹം (ഏകദേശം 22 ലക്ഷത്തിലധികം രൂപ) പിഴയും ലഭിക്കും. പൊതുസുരക്ഷയെയും സമാധാനത്തെയും ബാധിക്കുന്ന തരത്തിൽ കുട്ടികളുടെ വികാരങ്ങളെപ്പോലും ചൂഷണം ചെയ്തുകൊണ്ടാണ് ചില വീഡിയോകൾ നിർമ്മിച്ചതെന്ന് അധികൃതർ ചൂണ്ടിക്കാട്ടി.
ഇറാന്റെ എണ്ണ കയറ്റുമതി കേന്ദ്രമായ ഖാർഗ് ഐലൻഡിൽ യുഎസ്-ഇസ്രായേൽ സഖ്യം നടത്തിയ ആക്രമണത്തിന് യുഎഇയിലെ തുറമുഖങ്ങൾ ഉപയോഗിച്ചുവെന്ന് ഇറാൻ ആരോപിച്ചിരുന്നു. ഇതിനുപിന്നാലെ യുഎഇയിലെ മൂന്ന് പ്രധാന തുറമുഖങ്ങളിൽ നിന്ന് ആളുകളെ ഒഴിപ്പിക്കാൻ ഇറാൻ ഭീഷണി മുഴക്കിയിരുന്നു. ഈ സാഹചര്യത്തിൽ വ്യാജവാർത്തകൾ തടയാൻ കർശനമായ ഡിജിറ്റൽ നിരീക്ഷണമാണ് യുഎഇ ഏർപ്പെടുത്തിയിരിക്കുന്നത്.
