ധാക്ക: ബലിപെരുന്നാൾ (ഈദ് അൽ-അദ്ഹ) വിപണി സജീവമാകാനിരിക്കെ ബംഗ്ലാദേശിൽ നിന്നുള്ള രണ്ട് പോത്തുകളാണ് ഇപ്പോൾ സോഷ്യൽ മീഡിയയിൽ ലോകശ്രദ്ധ നേടുന്നത്. അമേരിക്കൻ പ്രസിഡന്റ് ഡൊണാൾഡ് ട്രംപ്, ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു എന്നിവരുടെ രൂപസാദൃശ്യമുള്ള രണ്ട് അപൂർവ്വ ‘അൽബിനോ’ (വെളുത്ത) പോത്തുകളാണ് ബംഗ്ലാദേശിലെ നാരായൺഗഞ്ചിലെ ഫാമുകളിൽ പ്രധാന ആകർഷണമായി മാറിയിരിക്കുന്നത് (Donald Trump Buffalo Bangladesh). ഇവയെ കാണാനും ചിത്രങ്ങൾ പകർത്താനുമായി ദിവസേന നൂറുകണക്കിന് ആളുകളാണ് ഫാമുകളിലേക്ക് എത്തിക്കൊണ്ടിരിക്കുന്നത്.
ഇതിൽ 700 കിലോഗ്രാം തൂക്കമുള്ള ഒരു പോത്തിന് സ്വർണ്ണനിറത്തിലുള്ള മുടിയും മുഖഭാവവും കാരണമാണ് ‘ഡൊണാൾഡ് ട്രംപ്’ എന്ന് പേരിട്ടിരിക്കുന്നത്. ട്രംപിന്റെ അതേ ഹെയർസ്റ്റൈലും മുഖവുമാണ് ഈ പോത്തിനുമുള്ളതെന്ന് ഫേസ്ബുക്കിൽ ചിത്രങ്ങൾ കണ്ട് ഫാമിലെത്തിയ സന്ദർശകർ പറയുന്നു. എന്നാൽ സ്വഭാവത്തിൽ ട്രംപിനെപ്പോലെയല്ല, കക്ഷി കടുത്ത ശാന്തനാണെന്നാണ് ഉടമ സിയാവുദ്ദീൻ മൃദ പറയുന്നത്. ഈ പോത്തിനെ ഇതിനോടകം തന്നെ കിലോഗ്രാമിന് 550 ടാക്ക (ബംഗ്ലാദേശ് കറൻസി) നിരക്കിൽ ഒരാൾക്ക് വിറ്റു കഴിഞ്ഞു.
മറ്റൊരു ഫാമിലുള്ള 750 കിലോയിലധികം തൂക്കമുള്ള പോത്തിന് ഇസ്രായേൽ പ്രധാനമന്ത്രി ‘ബെഞ്ചമിൻ നെതന്യാഹു’ എന്നാണ് പേരിട്ടിരിക്കുന്നത്. ഇതിന്റെ കണ്ണുകളും മുടിയും നെതന്യാഹുവിനോട് സാദൃശ്യമുള്ളതാണെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു. എന്നാൽ ട്രംപ് പോത്തിനെപ്പോലെയല്ല നെതന്യാഹു; കക്ഷി കടുത്ത അക്രമസ്വഭാവമുള്ളവനും മുൻകോപിയുമാണ്. ഭക്ഷണം കൊടുക്കാൻ ചെല്ലുമ്പോൾ പോലും തങ്ങളെ കുത്താൻ വരാറുണ്ടെന്ന് എസ്.എസ് കാറ്റിൽ ഫാമിലെ മാനേജർ പറയുന്നു. ഈ ഫാമിലുള്ള ആറ് അൽബിനോ പോത്തുകളിൽ വെച്ച് ഏറ്റവും വികൃതിയും കൗശലക്കാരനും ഈ നെതന്യാഹുവാണ്.
Summary: Two rare albino buffaloes named after US President Donald Trump and Israeli PM Benjamin Netanyahu have gone viral in Bangladesh ahead of Eid al-Adha. Located at farms in Narayanganj near Dhaka, the 700kg ‘Donald Trump’ buffalo attracted crowds due to its golden hair and hairstyle matching the US leader, though it is described as calm. Conversely, the 750kg buffalo named ‘Netanyahu’ has drawn attention for its aggressive and short-tempered behavior, with farm managers calling it difficult to handle.
