ബീജിംഗ്: ബംഗ്ലാദേശുമായുള്ള തീസ്ത നദി സമഗ്ര പരിപാലന പുനരുദ്ധാരണ പദ്ധതിയിൽ (TRCMRP) നിന്ന് പിന്നോട്ടില്ലെന്ന് ചൈന. ഇന്ത്യയുടെ ആശങ്കകൾ നിലനിൽക്കെയാണ്, ബംഗ്ലാദേശുമായുള്ള തങ്ങളുടെ സഹകരണം മൂന്നാമതൊരു കക്ഷിയുടെ ഇടപെടലുകളില്ലാതെ മുന്നോട്ട് പോകുമെന്ന് ചൈനീസ് വിദേശകാര്യ മന്ത്രാലയം വക്താവ് ഗുവോ ജിയാകുൻ വ്യക്തമാക്കിയത് (China Teesta River Project). ബംഗ്ലാദേശിന് അതീവ പ്രാധാന്യമുള്ള ഒരു ഉപജീവന പദ്ധതിയാണിതെന്നും, ഇതിനാവശ്യമായ എല്ലാ പിന്തുണയും ചൈന നൽകുമെന്നും അദ്ദേഹം പറഞ്ഞു.
ഇന്ത്യയുടെ ആശങ്കകൾ
ഇന്ത്യയുടെ വടക്കുകിഴക്കൻ സംസ്ഥാനങ്ങളോട് ചേർന്നുകിടക്കുന്ന തീസ്ത നദിയിലെ ചൈനയുടെ ഇടപെടൽ ഇന്ത്യയിൽ വലിയ ആശങ്കയാണ് ഉണ്ടാക്കുന്നത്. പ്രത്യേകിച്ച്, ഇന്ത്യയുടെ വടക്കുകിഴക്കൻ ഭാഗങ്ങളെ രാജ്യത്തിന്റെ മറ്റ് ഭാഗങ്ങളുമായി ബന്ധിപ്പിക്കുന്ന തന്ത്രപ്രധാനമായ ‘ചിക്കൻ നെക്ക്’ (സിലിഗുരി ഇടനാഴി) മേഖലയ്ക്ക് തൊട്ടടുത്താണ് ഈ പ്രദേശം എന്നതാണ് ഇന്ത്യയുടെ പ്രധാന സുരക്ഷാ ആശങ്ക. ഇത്തരം തന്ത്രപ്രധാനമായ മേഖലയിൽ ചൈനയുടെ സാന്നിധ്യം വർദ്ധിക്കുന്നത് സുരക്ഷാ വെല്ലുവിളിയാകുമെന്നാണ് ഇന്ത്യയുടെ വിലയിരുത്തൽ.
പദ്ധതിയുടെ സാങ്കേതിക സാധ്യതാ പഠനം നടത്താൻ ഇരുരാജ്യങ്ങളും തമ്മിൽ ധാരണയിലെത്തിയിട്ടുണ്ട്. ഈ പഠനത്തിന്റെ അടിസ്ഥാനത്തിൽ പദ്ധതിക്ക് ആവശ്യമായ എല്ലാ സഹായങ്ങളും നൽകുമെന്ന് ചൈന അറിയിച്ചു. നേരത്തെ ബംഗ്ലാദേശ് വാട്ടർ ഡെവലപ്മെന്റ് ബോർഡും ചൈനീസ് സർക്കാർ ഉടമസ്ഥതയിലുള്ള പവർചൈനയും (POWERCHINA) തമ്മിൽ കരാർ ഒപ്പുവെച്ചിരുന്നു. തീസ്ത പദ്ധതിയെ സംബന്ധിച്ച ചൈനയുടെ ഈ നിലപാട് ഇന്ത്യയും ബംഗ്ലാദേശും തമ്മിലുള്ള നയതന്ത്ര ബന്ധത്തെ എങ്ങനെ ബാധിക്കുമെന്നത് വരും ദിവസങ്ങളിൽ ഏറെ ചർച്ചയാകും.
Summary: China has reaffirmed its commitment to the Teesta River Comprehensive Management and Restoration Project (TRCMRP) in Bangladesh, dismissing India’s concerns by stating that its cooperation with Dhaka is a bilateral matter free from third-party influence. India remains wary of China’s deep involvement in the Teesta basin due to its proximity to the strategically vital Siliguri Corridor, known as the “Chicken’s Neck.” As Bangladesh and China prepare for a joint technical feasibility study for the project, India continues to monitor the development closely, citing potential security and strategic implications for its northeast region.
