ബീജിംഗ്: ചൈനയിലെ ലിയോണിംഗ് പ്രവിശ്യയിൽ പതിനൊന്നാം നിലയിലെ ഫ്ലാറ്റിൽ നിന്നും താഴേക്ക് വീണ നാല് വയസ്സുകാരൻ അത്ഭുതകരമായി രക്ഷപ്പെട്ടു (China Boy Survives 11th Floor Fall). ഏപ്രിൽ 11-ന് ഡാലിയൻ നഗരത്തിലാണ് നാടിനെ നടുക്കിയ ഈ സംഭവം നടന്നത്. സാരമായ പരിക്കേറ്റ കുട്ടി ഐസിയുവിൽ 18 ദിവസത്തെ ചികിത്സയ്ക്ക് ശേഷം അപകടനില തരണം ചെയ്ത് സാധാരണ വാർഡിലേക്ക് മാറി.
ജോലി ആവശ്യത്തിനായി മാതാപിതാക്കൾ പുറത്തുപോയ സമയത്താണ് ഷിയോമിംഗ് എന്ന് വിളിക്കുന്ന ബാലൻ അപകടത്തിൽപ്പെട്ടത്. സുരക്ഷയ്ക്കായി ജനാലകൾ പൂട്ടിയിരുന്നെങ്കിലും കുട്ടി എങ്ങനെയോ താക്കോൽ കൈക്കലാക്കി ജനൽ തുറക്കുകയായിരുന്നു. വീട്ടിലെത്തിയ പിതാവ് മകനെ കാണാതെ അന്വേഷിച്ചപ്പോഴാണ് കെട്ടിടത്തിന് താഴെ കോൺക്രീറ്റ് തറയിൽ വീണുകിടക്കുന്ന നിലയിൽ കണ്ടെത്തിയത്. ഉടൻ തന്നെ ആശുപത്രിയിലെത്തിച്ചെങ്കിലും അതിജീവന സാധ്യത അഞ്ച് ശതമാനം മാത്രമാണെന്നായിരുന്നു ഡോക്ടർമാരുടെ ആദ്യ വിലയിരുത്തൽ.
ആന്തരികാവയവങ്ങൾക്കും എല്ലുകൾക്കും ഗുരുതരമായി പരിക്കേറ്റ കുട്ടി മരണത്തെ മുഖാമുഖം കണ്ടെങ്കിലും വൈദ്യശാസ്ത്രത്തെ പോലും അമ്പരപ്പിച്ചുകൊണ്ട് ജീവിതത്തിലേക്ക് മടങ്ങിവന്നു. എന്തിനാണ് ജനാലയിലൂടെ പുറത്തേക്ക് നോക്കിയതെന്ന് മാതാപിതാക്കൾ ചോദിച്ചപ്പോൾ, അമ്മയെ കാണാത്തതുകൊണ്ട് അവർ വരുന്നുണ്ടോ എന്ന് നോക്കാൻ വേണ്ടിയാണ് താൻ ജനലിൽ കയറിയതെന്നാണ് കുഞ്ഞ് വിതുമ്പിക്കൊണ്ട് മറുപടി നൽകിയത്.
കുട്ടിയുടെ വൈകാരികമായ ഈ മറുപടി ഇപ്പോൾ സോഷ്യൽ മീഡിയയിൽ വലിയ ചർച്ചയായിരിക്കുകയാണ്. കുട്ടി പൂർണ്ണ ആരോഗ്യവാനായി തിരിച്ചുവരുമെന്ന പ്രതീക്ഷയിലാണ് മാതാപിതാക്കൾ. തങ്ങളുടെ മകന്റെ ഈ തിരിച്ചുവരവ് ഒരു വലിയ അത്ഭുതമാണെന്ന് അവർ മാധ്യമങ്ങളോട് പറഞ്ഞു.
Summary: A four-year-old boy in China’s Dalian survived an 11-story fall from his apartment after climbing a window to look for his mother. Despite initially having only a 5% survival rate due to severe injuries, the child is recovering after 18 days in ICU.
