സ്മാർട്ട് റിംഗ് വിപണിയിലേക്ക് ചുവടുവെക്കാൻ ആപ്പിൾ ഒരുങ്ങുന്നു. സാംസങ് ഗാലക്സി റിംഗ്, ഓറ റിംഗ് എന്നിവയ്ക്ക് വെല്ലുവിളി ഉയർത്തിക്കൊണ്ട് ആപ്പിൾ ‘ഐറിംഗ്’ എന്ന പേരിൽ സ്മാർട്ട് റിംഗ് വികസിപ്പിക്കുന്നുവെന്നാണ് പുതിയ റിപ്പോർട്ടുകൾ (Apple iRing). പ്രമുഖ ടിപ്സ്റ്ററായ കൊസുതാമി (@Kosutami_Ito) ആണ് ആപ്പിളിന്റെ പുതിയ പദ്ധതിയെക്കുറിച്ചുള്ള സൂചനകൾ പുറത്തുവിട്ടിരിക്കുന്നത്. നിലവിൽ നിർമ്മാണത്തിന്റെ പ്രാരംഭ ഘട്ടത്തിലാണ് ഈ വെയറബിൾ ഡിവൈസ് എന്നാണ് സൂചനകൾ.
പുതിയ ഉൽപ്പന്നങ്ങൾ വിപണിയിലെത്തിക്കുന്നതിന് മുൻപ് വിപണി ട്രെൻഡുകൾ കൃത്യമായി വിശകലനം ചെയ്യുന്ന ആപ്പിളിന്റെ പതിവ് ശൈലി തന്നെയാകും ഈ സ്മാർട്ട് റിംഗിന്റെ കാര്യത്തിലും പിന്തുടരുക. ആരോഗ്യ-ഫിറ്റ്നസ് ട്രാക്കിംഗ് സെൻസറുകൾ, ആപ്പിൾ വിഷൻ പ്രോ ഹെഡ്സെറ്റുമായി ബന്ധപ്പെട്ട ഹാൻഡ് ഡിറ്റക്ഷൻ തുടങ്ങിയ സവിശേഷതകൾ ഐറിംഗിൽ പ്രതീക്ഷിക്കാം. സ്മാർട്ട് വാച്ചിന് പകരമായി കുറഞ്ഞ വിലയിൽ ലഭ്യമാക്കാവുന്ന ഒരു സ്ക്രീൻ-രഹിത വെയറബിൾ എന്ന നിലയിലാണ് ഇതിനെ ആപ്പിൾ കാണുന്നത്. സാംസങ് ഗാലക്സി റിംഗ് 2024-ൽ വിപണിയിലെത്തിയതിന് പിന്നാലെയാണ് ആപ്പിളിന്റെ ഈ നീക്കം. ഐറിംഗിന്റെ ഔദ്യോഗിക ലോഞ്ച് തീയതി സംബന്ധിച്ച് ആപ്പിൾ ഇതുവരെ പ്രതികരിച്ചിട്ടില്ല.
Summary: Apple is reportedly developing a smart ring, tentatively dubbed “iRing,” to compete with established players like the Samsung Galaxy Ring and Oura Ring. Tipster Kosutami indicated that the device is in the early stages of development, focusing on health and fitness tracking features, and possibly integrating with the Apple Vision Pro headset.
