ചെന്നൈ: തമിഴ്നാട്ടിൽ പുതിയതായി അധികാരമേറ്റ മന്ത്രിസഭയിലെ വകുപ്പുവിഭജനം പൂർത്തിയായി. കടുത്ത രാഷ്ട്രീയ പോരാട്ടങ്ങൾക്കൊടുവിൽ അധികാരത്തിലെത്തിയ പുതിയ മുഖ്യമന്ത്രി വിജയ് തന്നെയാണ് ആഭ്യന്തരവകുപ്പ് കൈകാര്യം ചെയ്യുക (Tamil Nadu Cabinet Portfolio Allocation). ആഭ്യന്തരത്തിന് പുറമെ പോലീസ്, പൊതുഭരണം, യുവക്ഷേമം, മുൻസിപ്പൽ അഡ്മിനിസ്ട്രേഷൻ, വനിതാ-ശിശുക്ഷേമം തുടങ്ങിയ പ്രധാന വകുപ്പുകളും മുഖ്യമന്ത്രിയുടെ കീഴിലാണ്.
മന്ത്രിസഭയിലെ മുതിർന്ന നേതാവായ കെ.എ. സെങ്കോട്ടയ്യനാണ് ഏറ്റവും നിർണ്ണായകമായ ധനകാര്യ വകുപ്പ് നൽകിയിരിക്കുന്നത്. അതേസമയം, മന്ത്രിസഭയിലെ ഏറ്റവും പ്രായംകുറഞ്ഞ അംഗമായ എസ്. കീർത്തനയ്ക്ക് വ്യവസായവകുപ്പ് നൽകി. യുവനേതാവ് ആദവ് അർജുനയ്ക്ക് പൊതുമരാമത്ത്, കായിക വകുപ്പുകളുടെ ചുമതല ലഭിച്ചപ്പോൾ, എൻ. ആനന്ദിനാണ് ഗ്രാമവികസനം, ജലവിഭവ വകുപ്പുകൾ നൽകിയിരിക്കുന്നത്.
മറ്റ് പ്രധാന വകുപ്പുകൾ ഇങ്ങനെ: ഡോ. കെ.ജി. അരുൺരാജിന് ആരോഗ്യവകുപ്പും മെഡിക്കൽ വിദ്യാഭ്യാസവും നൽകിയപ്പോൾ, ഭക്ഷ്യ-പൊതുവിതരണ വകുപ്പ് പി. വെങ്കട്ടരമണനും ഊർജവിഭവ-നിയമവകുപ്പുകൾ ആർ. നിർമൽകുമാറിനും ലഭിച്ചു. തമിഴ്നാട്ടിൽ ഏറെ നിർണ്ണായകമായ സ്കൂൾ വിദ്യാഭ്യാസവകുപ്പ് രാജ്മോഹനാണ് നൽകിയിരിക്കുന്നത്. പ്രകൃതിവിഭവം, മിനറൽ ആൻഡ് മൈൻസ് വകുപ്പ് ഡോ. ടി.കെ. പ്രഭുവിനും ലഭിച്ചു. വകുപ്പുവിഭജനം പൂർത്തിയായതോടെ പുതിയ തമിഴ്നാട് സർക്കാർ വികസന പ്രവർത്തനങ്ങളിലേക്ക് വേഗത്തിൽ കടക്കുമെന്നാണ് തമിഴകത്തുനിന്നുള്ള റിപ്പോർട്ടുകൾ സൂചിപ്പിക്കുന്നത്.
Summary: The portfolio allocation for the newly formed Tamil Nadu cabinet has been completed. Chief Minister Vijay will retain key portfolios including Home, Police, Public Administration, Youth Welfare, and Women & Child Welfare. Senior leader K.A. Sengottaiyan has been allocated the Finance ministry, while S. Keerthana, the youngest member of the cabinet, takes charge of the Industries department. Aadhav Arjuna will handle Public Works and Sports, and Dr. K.G. Arunraj is appointed as the Minister for Health and Family Welfare.
