ന്യൂഡൽഹി: സി.ബി.എസ്.ഇ പ്ലസ് ടു പരീക്ഷയുടെ ഉത്തരക്കടലാസുകൾ മാറിനൽകിയതുമായി ബന്ധപ്പെട്ട വിവാദങ്ങൾ രാജ്യത്ത് തുടരുന്നതിനിടെ, ഇരയായ വിദ്യാർത്ഥികൾക്ക് നേരിട്ട് പിന്തുണ പ്രഖ്യാപിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി (Rahul Gandhi on CBSE Answer Sheet Mix up). മൂല്യനിർണ്ണയത്തിലെ അപാകതകളെ തുടർന്ന് ഉത്തരക്കടലാസ് ഡൗൺലോഡ് ചെയ്തപ്പോൾ മറ്റൊരാളുടെ പേപ്പർ ലഭിക്കുകയും, അത് സമൂഹമാധ്യമങ്ങളിലൂടെ ചോദ്യം ചെയ്തതിന് കടുത്ത സൈബറാക്രമണം നേരിടേണ്ടി വരികയും ചെയ്ത വേദാന്ത് ഉൾപ്പെടെയുള്ള വിദ്യാർത്ഥികളുമായാണ് രാഹുൽ ഗാന്ധി കൂടിക്കാഴ്ച നടത്തിയത്.
കുട്ടികളുമായി സംസാരിക്കുന്നതിന്റെ വീഡിയോ അദ്ദേഹം തന്റെ ഔദ്യോഗിക എക്സ് അക്കൗണ്ടിൽ പങ്കുവെച്ചിട്ടുണ്ട്. വേദാന്തും കൂട്ടുകാരും രാജ്യത്തെ മിടുക്കരും ധൈര്യശാലികളുമായ കൗമാരക്കാരാണെന്നും, സി.ബി.എസ്.ഇയോടും മോദി സർക്കാരിനോടും അവർ ലളിതമായ ചോദ്യങ്ങൾ ചോദിച്ചതിന് ഉത്തരങ്ങൾക്ക് പകരം കടുത്ത അപമാനമാണ് അധികാരികളിൽ നിന്നും സൈബർ ഇടങ്ങളിൽ നിന്നും അവർക്ക് ലഭിച്ചതെന്നും രാഹുൽ ഗാന്ധി കുറ്റപ്പെടുത്തി. തിളക്കമാർന്ന ഭാവി അർഹിക്കുന്ന ഈ കുട്ടികൾക്ക് നീതി ഉറപ്പാക്കുമെന്നും അദ്ദേഹം വ്യക്തമാക്കി.
പരീക്ഷാ അപാകത ചൂണ്ടിക്കാണിച്ചതിന് തങ്ങളെ ദേശവിരുദ്ധരെന്നും പാകിസ്താനികളെന്നും വിളിച്ച് ചിലർ ആക്ഷേപിച്ചതായി വിദ്യാർത്ഥികൾ രാഹുൽ ഗാന്ധിയോട് സങ്കടം പങ്കുവെച്ചു. എന്നാൽ, കുട്ടികളെ ഇത്തരത്തിൽ വേട്ടയാടിയ സൈബർ ട്രോളർമാരെ രാഹുൽ ഗാന്ധി രൂക്ഷമായ ഭാഷയിൽ പരിഹസിച്ചു. കേവലം 17 വയസ്സുള്ള കുട്ടികളെയാണോ ഇവർ ‘ഡീപ് സ്റ്റേറ്റ് ഏജന്റുമാർ’ എന്ന് വിളിക്കുന്നതെന്നും, സ്വന്തം ഉത്തരക്കടലാസ് ചോദിച്ചതിന്റെ പേരിൽ പെട്ടെന്ന് എങ്ങനെയാണ് കുട്ടികൾ ദേശവിരുദ്ധരാകുന്നതെന്നും അദ്ദേഹം ചോദിച്ചു. രാജ്യത്തെ യഥാർത്ഥ പ്രശ്നങ്ങളെ അംഗീകരിച്ചാൽ മാത്രമേ അവ പരിഹരിക്കാൻ സാധിക്കൂ എന്ന് അദ്ദേഹം ഓർമ്മിപ്പിച്ചു.
അതേസമയം, പൊതുജനമധ്യത്തിൽ വിഷയം വലിയ ചർച്ചയായതോടെ വേദാന്തിന്റെ ഉത്തരപേപ്പർ മാറി നൽകിയത് തന്നെയാണെന്ന് സി.ബി.എസ്.ഇ ഒടുവിൽ സമ്മതിക്കുകയും യഥാർത്ഥ ഉത്തരപേപ്പർ വിദ്യാർത്ഥിക്ക് കൈമാറുകയും ചെയ്തു. തങ്ങൾ പാകിസ്താനികൾ അല്ലെന്നും പരീക്ഷാ അപാകതകൾ അധികൃതരുടെ ശ്രദ്ധയിൽപ്പെടുത്താൻ മാത്രമാണ് സമൂഹമാധ്യമ അക്കൗണ്ട് ആരംഭിച്ചതെന്നും വേദാന്തിന്റെ കുടുംബം വ്യക്തമാക്കിയിട്ടുണ്ട്.
Summary: Leader of the Opposition Rahul Gandhi met with CBSE Class 12 students who faced severe cyberbullying after exposing an answer sheet mix-up by the board. Gandhi strongly criticized the social media trolls and the government for labeling 17-year-old students as “anti-national” simply for demanding their rightful academic papers. Following intense public pressure and scrutiny, the CBSE finally admitted to the administrative error and issued the correct answer sheet to the affected student.
