ചെന്നൈ: വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി തമിഴ്നാട് രാഷ്ട്രീയത്തെ ഞെട്ടിച്ചുകൊണ്ട് മുൻ മുഖ്യമന്ത്രിയും എ.ഐ.എ.ഡി.എം.കെ. മുൻ കോർഡിനേറ്ററുമായ ഒ. പനീർസെൽവം ഭരണകക്ഷിയായ ഡി.എം.കെ.യിൽ ചേർന്നു (Panneerselvam Joins DMK MK Stalin). മുഖ്യമന്ത്രിയും ഡി.എം.കെ. അധ്യക്ഷനുമായ എം.കെ. സ്റ്റാലിന്റെ സാന്നിധ്യത്തിൽ ചെന്നൈയിലെ അറിവാളയത്തിൽ വെച്ചായിരുന്നു ഔദ്യോഗികമായി പാർട്ടിയിൽ അംഗത്വമെടുത്തത്. മൂന്ന് തവണ മുഖ്യമന്ത്രിയായിരുന്ന പനീർസെൽവത്തിന്റെ ഈ നീക്കം എ.ഐ.എ.ഡി.എം.കെ. ക്യാമ്പിനെ കടുത്ത പ്രതിസന്ധിയിലാക്കിയിരിക്കുകയാണ്.
എടപ്പാടി പളനിസ്വാമിയുമായുള്ള (EPS) അധികാരത്തർക്കത്തെത്തുടർന്ന് 2022-ൽ പാർട്ടിയിൽ നിന്ന് പുറത്താക്കപ്പെട്ട പനീർസെൽവം കഴിഞ്ഞ കുറച്ചു കാലമായി സ്വന്തം പക്ഷമായി നിലകൊള്ളുകയായിരുന്നു. തന്റെ മകൻ രവീന്ദ്രനോടൊപ്പമാണ് അദ്ദേഹം ഡി.എം.കെ. ആസ്ഥാനത്തെത്തിയത്. ജയലളിതയുടെ വിശ്വസ്തനായിരുന്ന പനീർസെൽവം, താൻ എന്ത് തെറ്റാണ് ചെയ്തതെന്ന് തെളിയിച്ചാൽ രാഷ്ട്രീയം വിടാൻ തയ്യാറാണെന്ന് കഴിഞ്ഞ ദിവസവും വ്യക്തമാക്കിയിരുന്നു. എ.ഐ.എ.ഡി.എം.കെ.യുടെ നിയമങ്ങളിൽ വരുത്തിയ മാറ്റങ്ങളെയും എടപ്പാടിയുടെ നേതൃത്വത്തെയും അദ്ദേഹം കടുത്ത ഭാഷയിൽ വിമർശിച്ചു.
Ex-Tamil Nadu Chief Minister & expelled AIADMK leader OPS joins DMK in presence of Chief Minister MK Stalin ahead of polls
NDTV’s @jsamdaniel joins @ParmeshwarBawa with more details pic.twitter.com/vyfISRmOmk
— NDTV (@ndtv) February 27, 2026
ഈ വർഷം നടക്കാനിരിക്കുന്ന നിയമസഭാ തിരഞ്ഞെടുപ്പിൽ സ്റ്റാലിന്റെ നേതൃത്വത്തിലുള്ള സഖ്യത്തിന് പനീർസെൽവത്തിന്റെ കടന്നുവരവ് വലിയ കരുത്താകും. ദക്ഷിണ തമിഴ്നാട്ടിലെ തേവർ സമുദായ വോട്ടുകളിൽ വലിയ സ്വാധീനമുള്ള നേതാവാണ് ഒ.പി.എസ്. ഇതേ സമുദായത്തിൽപ്പെട്ട വി.കെ. ശശികല കഴിഞ്ഞ ദിവസം പുതിയ പാർട്ടി പ്രഖ്യാപിച്ചതിന് പിന്നാലെയാണ് ഒ.പി.എസ്. ഡി.എം.കെ.യിൽ ചേർന്നിരിക്കുന്നത്. വിജയിയുടെ തമിഴക വെട്രി കഴകം (TVK) മത്സരരംഗത്തുള്ളതിനാൽ ഇത്തവണ തമിഴ്നാട്ടിൽ ത്രികോണ മത്സരം ഉറപ്പായിക്കഴിഞ്ഞു. എ.ഐ.എ.ഡി.എം.കെ.യെ ദുർബലപ്പെടുത്തി വോട്ടുകൾ ഭിന്നിപ്പിക്കുക എന്ന തന്ത്രപരമായ നീക്കമാണ് ഡി.എം.കെ. ഇതിലൂടെ ലക്ഷ്യമിടുന്നത്.
Summary: In a major political realignment, former Tamil Nadu Chief Minister O. Panneerselvam (OPS) officially joined the DMK in the presence of CM MK Stalin.
