ന്യൂഡൽഹി: നീറ്റ് യുജി (NEET UG) പുനഃപരീക്ഷ എഴുതുന്ന വിദ്യാർത്ഥികൾക്ക് ആശ്വാസകരമായ പ്രഖ്യാപനവുമായി നാഷണൽ ടെസ്റ്റിംഗ് ഏജൻസി (NTA). ജൂൺ 21-ന് നടക്കാനിരിക്കുന്ന പുനഃപരീക്ഷയുടെ സമയദൈർഘ്യം 15 മിനിറ്റ് കൂടി വർദ്ധിപ്പിച്ചതായി എൻടിഎ ഔദ്യോഗികമായി അറിയിച്ചു (NEET UG 2026 retest duration). ഇതോടെ പരീക്ഷയുടെ ആകെ സമയം 180 മിനിറ്റിൽ നിന്നും 195 മിനിറ്റായി (3 മണിക്കൂർ 15 മിനിറ്റ്) ഉയരും. മുൻ നിശ്ചയപ്രകാരം ഉച്ചയ്ക്ക് രണ്ട് മണിക്ക് ആരംഭിക്കുന്ന പരീക്ഷ വൈകുന്നേരം 5:15-നായിരിക്കും അവസാനിക്കുക. പരീക്ഷാ നടപടിക്രമങ്ങൾ സുഗമമാക്കുന്നതിനും വിദ്യാർത്ഥികളുടെ സമ്മർദ്ദം കുറയ്ക്കുന്നതിനുമാണ് ഈ അധിക സമയം അനുവദിച്ചതെന്ന് എൻടിഎ വ്യക്തമാക്കി.
പരീക്ഷാ സമയത്തിന് പുറമെ ചോദ്യപേപ്പർ ബുക്ക്ലെറ്റിലും (Question Booklet) വിദ്യാർത്ഥികൾക്കായി പ്രധാന മാറ്റങ്ങൾ വരുത്തിയിട്ടുണ്ട്. ഫിസിക്സ്, കെമിസ്ട്രി കണക്കുകൂട്ടലുകൾക്കും ഡയഗ്രം വരച്ചുനോക്കുന്നതിനുമുള്ള റഫ് വർക്കുകൾക്കായി (Rough Work) ബുക്ക്ലെറ്റിൽ രണ്ട് പേജുകൾ അധികമായി അനുവദിക്കും. പുതുക്കിയ ക്രമീകരണമനുസരിച്ച് രണ്ട് റഫ് പേജുകൾ ബുക്ക്ലെറ്റിന്റെ അവസാന ഭാഗത്തും, രണ്ട് പേജുകൾ പരീക്ഷാ മാർഗ്ഗനിർദ്ദേശങ്ങൾ അടങ്ങിയ ആദ്യ പേജിനോട് ചേർന്നുമായിരിക്കും ക്രമീകരിക്കുക. ഇംഗ്ലീഷ് ചോദ്യപേപ്പറുകളിലും പ്രാദേശിക ഭാഷകളിലുള്ള ചോദ്യപേപ്പറുകളിലും ഈ പുതിയ മാറ്റം പ്രതിഫലിക്കും. പരീക്ഷ എഴുതുന്നതിന് മുൻപായി വിദ്യാർത്ഥികൾ ചോദ്യപേപ്പറിന് മുന്നിലുള്ള നിർദ്ദേശങ്ങൾ കൃത്യമായി വായിച്ചു മനസ്സിലാക്കണമെന്നും എൻടിഎ നിർദ്ദേശിച്ചിട്ടുണ്ട്.
കഴിഞ്ഞ മെയ് 3-ന് രാജ്യത്തുടനീളം നടന്ന നീറ്റ് പരീക്ഷയുടെ ചോദ്യപേപ്പർ ചോർന്നതായുള്ള കണ്ടെത്തലുകളെ തുടർന്നാണ് രാജ്യം കണ്ട ഏറ്റവും വലിയ പുനഃപരീക്ഷയ്ക്ക് എൻടിഎ നിർബന്ധിതരായത്. കടുത്ത വിവാദങ്ങൾക്കും വിദ്യാർത്ഥി പ്രതിഷേധങ്ങൾക്കും പിന്നാലെ 22 ലക്ഷത്തിലധികം ഉദ്യോഗാർത്ഥികൾ എഴുതിയ പരീക്ഷ മെയ് 12-നാണ് എൻടിഎ ഔദ്യോഗികമായി റദ്ദാക്കിയത്. ചോദ്യപേപ്പർ ചോർച്ചയുമായി ബന്ധപ്പെട്ട് വിവിധ സംസ്ഥാനങ്ങളിൽ നിന്നായി നിലവിൽ 13-ലധികം പേരെ പോലീസ് അറസ്റ്റ് ചെയ്തിട്ടുണ്ട്. നിലവിൽ കേന്ദ്ര സർക്കാരിന്റെ നിർദ്ദേശപ്രകാരം സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (CBI) ആണ് ഈ കേസിലെ അട്ടിമറിയെക്കുറിച്ചുള്ള സമഗ്രമായ അന്വേഷണം നടത്തിവരുന്നത്. ജുൺ 21-ലെ പരീക്ഷയ്ക്ക് കനത്ത സുരക്ഷാ ക്രമീകരണങ്ങളാണ് ഒരുക്കിയിട്ടുള്ളത്.
Story Summary: The National Testing Agency (NTA) has extended the duration of the upcoming NEET UG re-examination, scheduled for June 21, 2026, by 15 minutes. The total exam time will now be 195 minutes (2:00 PM to 5:15 PM). Additionally, NTA will provide two extra pages in the booklet for rough work to assist students. The nationwide re-test was ordered after the May 3 exam, attempted by over 22 lakh students, was cancelled on May 12 due to a paper leak case currently being probed by the CBI.
