കുട്ടിക്കാലത്ത് അമ്മയ്ക്ക് നൽകിയ വാക്ക് പാലിച്ച് മകൻ ഒരുക്കിയ ഹെലികോപ്റ്റർ യാത്ര സമൂഹമാധ്യമങ്ങളിൽ വൈറലാകുന്നു. ഇൻസ്റ്റാഗ്രാം ഇൻഫ്ലുവൻസറായ യോഗേഷ് റാവത്താണ് തന്റെ അമ്മയെ ആദ്യമായി ഹെലികോപ്റ്ററിൽ യാത്ര ചെയ്യിച്ചുകൊണ്ട് ഈ മനോഹരമായ നിമിഷം പങ്കുവെച്ചത്. മുനിഷ്യാരിയിൽ വെച്ചാണ് അദ്ദേഹം തന്റെ പഴയ വാക്ക് നിറവേറ്റിയത്. (Mother Helicopter Ride)
യാത്ര തുടങ്ങുന്നതിന് മുൻപ് ഹെലികോപ്റ്റർ കണ്ട് അമ്മയ്ക്ക് ചെറിയൊരു പേടി തോന്നിയിരുന്നു. മകന്റെ കാലിൽ മുറുകെപ്പിടിച്ച് തനിക്ക് പേടിയാണെന്നും യാത്ര വേണ്ടെന്നും അവർ പറയുന്നതും വീഡിയോയിൽ കാണാം. എന്നാൽ മകൻ ധൈര്യം നൽകിയതോടെ അവർ യാത്രയ്ക്കായി തയ്യാറായി. യാത്ര തുടങ്ങിയതോടെ അമ്മയുടെ ഭയം മാറി വലിയ സന്തോഷത്തിലേക്ക് വഴിമാറി. യാത്രയ്ക്കിടയിൽ മകന്റെ സൺഗ്ലാസ് വെച്ച് ആസ്വദിക്കുന്ന അമ്മയുടെ വീഡിയോ കാഴ്ചക്കാരിൽ വലിയൊരു വികാരം ഉണർത്തി. മനോഹരമായ ഗ്രാമത്തിന്റെ ആകാശക്കാഴ്ചകൾ ആസ്വദിച്ച അമ്മ, യാത്രയ്ക്ക് ശേഷം ‘വളരെ മികച്ചതായിരുന്നു’ എന്ന് മറുപടി നൽകി.
ഏഴ് മില്യണിലധികം ആളുകളാണ് ഈ വീഡിയോ ഇതിനകം കണ്ടത്. ഒരു മകന്റെ ഏറ്റവും വലിയ വിജയം അമ്മയുടെ മുഖത്തെ പുഞ്ചിരിയാണെന്നും, ഇത് ശരിക്കുമുള്ള വിജയത്തിന്റെ നിർവചനമാണെന്നും കമന്റുകൾ നിറയുകയാണ്. മാതാപിതാക്കൾക്ക് ഇത്തരം പ്രത്യേക നിമിഷങ്ങൾ സമ്മാനിക്കാൻ എല്ലാവരും തയ്യാറാകണമെന്ന സന്ദേശമാണ് ഈ വീഡിയോ നൽകുന്നത്. തന്റെ അമ്മയെ ചുറ്റിക്കാണിക്കുമ്പോൾ, ഒരു കുട്ടിയെപ്പോലെ താനും ഏറെ സന്തോഷവാനാണെന്ന് യോഗേഷ് റാവത്ത് കുറിക്കുന്നു.
