സീറ്റിൽ: ആഗോള സാങ്കേതികവിദ്യാരംഗത്തെ പ്രമുഖ ഇന്ത്യൻ വംശജനും മൈക്രോസോഫ്റ്റിന്റെ മുൻ കോർപ്പറേറ്റ് വൈസ് പ്രസിഡന്റുമായ എസ്. ‘സോമ’ സോമശേഖർ (59) അന്തരിച്ചു ( Microsoft Veteran Soma Somasegar Passes Away). കഴിഞ്ഞ 11 വർഷമായി അദ്ദേഹം മാനേജിങ് ഡയറക്ടറായി സേവനമനുഷ്ഠിച്ചിരുന്ന സീറ്റിൽ ആസ്ഥാനമായുള്ള പ്രമുഖ വെഞ്ച്വർ ക്യാപിറ്റൽ സ്ഥാപനമായ മാഡ്രോണ വെഞ്ച്വർ ഗ്രൂപ്പാണ് അപ്രതീക്ഷിത വിയോഗവാർത്ത സ്ഥിരീകരിച്ചത്. പുതുച്ചേരിയിൽ ജനിച്ച സോമശേഖർ, മൂന്ന് പതിറ്റാണ്ടോളം മൈക്രോസോഫ്റ്റിൽ നിർണായക പദവികൾ വഹിച്ച ശേഷം വെഞ്ച്വർ ക്യാപിറ്റൽ രംഗത്തേക്ക് ചുവടുമാറ്റുകയായിരുന്നു.
1989-ൽ മൈക്രോസോഫ്റ്റിൽ ചേർന്ന അദ്ദേഹം വിൻഡോസ് എൻടി ഉൾപ്പെടെയുള്ള വിൻഡോസിന്റെ എട്ടോളം പതിപ്പുകളുടെ നിർമ്മാണത്തിൽ പ്രധാന പങ്കുവഹിച്ചു. പിന്നീട് കമ്പനിയുടെ ഡെവലപ്പർ ഡിവിഷൻ മേധാവിയായി ഉയർന്ന സോമശേഖർ വിഷ്വൽ സ്റ്റുഡിയോ, .NET ഫ്രെയിംവർക്ക് എന്നിവയുടെ വളർച്ചയ്ക്ക് നേതൃത്വം നൽകി. കമ്പനിയുടെ ഹൈദരാബാദ്, ചൈന, ഇസ്രായേൽ ആർ ആൻഡ് ഡി (R&D) ഹബ്ബുകളുടെ വിപുലീകരണത്തിലും അദ്ദേഹം നിർണായക പങ്കുവഹിച്ചു. 2015-ൽ മൈക്രോസോഫ്റ്റ് വിട്ട ശേഷം മാഡ്രോണ ഗ്രൂപ്പിൽ ചേർന്ന അദ്ദേഹം ആർട്ടിഫിഷ്യൽ ഇന്റലിജൻസ്, ക്ലൗഡ് ഇൻഫ്രാസ്ട്രക്ചർ സ്റ്റാർട്ടപ്പുകളെ വളർത്തിയെടുക്കുന്നതിൽ സജീവമായിരുന്നു. മരണവാർത്ത പുറത്തുവരുന്നതിന് മണിക്കൂറുകൾക്ക് മുൻപാണ്, 2026-ലെ മികച്ച നിക്ഷേപകരെ ആദരിക്കുന്ന ആഗോള ‘SEED 100’ പട്ടികയിൽ അദ്ദേഹത്തെ ഉൾപ്പെടുത്തിയത്.
Summary: S. “Soma” Somasegar, an influential Indian-origin technology executive and former Microsoft Corporate Vice President, has passed away unexpectedly at the age of 59. Born in Puducherry, Somasegar spent nearly three decades at Microsoft, leading key platforms like Visual Studio and the .NET framework, and expanding global R&D hubs including Hyderabad.
