ലണ്ടൻ: 2026-ലെ ബാഫ്റ്റ (BAFTA) പുരസ്കാര വേദിയിൽ ചരിത്രം കുറിച്ച് ഇന്ത്യൻ ചിത്രം ‘ബൂങ്’. മികച്ച ചിൽഡ്രൻസ് ആൻഡ് ഫാമിലി ഫിലിം വിഭാഗത്തിലാണ് മണിപ്പൂരി ഭാഷയിലുള്ള ഈ ചിത്രം പുരസ്കാരം നേടിയത് (Manipuri Film Boong Wins BAFTA Award). ഫർഹാൻ അക്തർ നിർമ്മാണ പങ്കാളിയായ ഈ ചിത്രം ഇത്തവണ ബാഫ്റ്റ നേടുന്ന ആദ്യ ഇന്ത്യൻ സിനിമയാണ്. ‘സൂട്രോപോളിസ് 2’, ‘ലിലോ ആൻഡ് സ്റ്റിച്ച്’ തുടങ്ങിയ പ്രമുഖ രാജ്യാന്തര ചിത്രങ്ങളെ പിന്തള്ളിയാണ് ‘ബൂങ്’ ഈ നേട്ടം കൈവരിച്ചത്.
ലക്ഷ്മിപ്രിയ ദേവി സംവിധാനം ചെയ്ത ‘ബൂങ്’ സാമൂഹികവും രാഷ്ട്രീയവുമായ സംഘർഷങ്ങൾ നിലനിൽക്കുന്ന മണിപ്പൂരിലെ ഒരു ചെറിയ ബാലന്റെ കഥയാണ് പറയുന്നത്. തന്റെ കുടുംബം വീണ്ടും ഒന്നിക്കണമെന്നും കാണാതായ അച്ഛനെ തിരികെ കൊണ്ടുവന്നാൽ അമ്മയുടെ സങ്കടം മാറുമെന്നും വിശ്വസിക്കുന്ന ‘ബൂങ്’ എന്ന ബാലൻ സുഹൃത്തിനൊപ്പം നടത്തുന്ന യാത്രയാണ് സിനിമയുടെ ഇതിവൃത്തം. ഗുഗുൻ കിപ്ജെൻ ആണ് ചിത്രത്തിൽ പ്രധാന വേഷം അവതരിപ്പിച്ചത്. മ്യാൻമർ അതിർത്തിയോട് ചേർന്നുള്ള മോറെ എന്ന പട്ടണത്തിലേക്കും തുടർന്ന് അതിർത്തി കടന്നും അച്ഛനെ തേടി പോകുന്ന കുട്ടികളുടെ വൈകാരികമായ യാത്ര പ്രേക്ഷകരുടെ മനസ്സ് കീഴടക്കി.
ടൊറന്റോ ഇന്റർനാഷണൽ ഫിലിം ഫെസ്റ്റിവലിൽ പ്രീമിയർ ചെയ്ത ചിത്രം മെൽബൺ, മുംബൈ, വാർസോ തുടങ്ങിയ നിരവധി അന്താരാഷ്ട്ര ചലച്ചിത്ര മേളകളിൽ നേരത്തെ ശ്രദ്ധിക്കപ്പെട്ടിരുന്നു. ഇന്ത്യൻ പ്രാദേശിക സിനിമകൾക്ക്, പ്രത്യേകിച്ച് വടക്കുകിഴക്കൻ സംസ്ഥാനങ്ങളിൽ നിന്നുള്ള ചിത്രങ്ങൾക്ക് ആഗോളതലത്തിൽ ലഭിക്കുന്ന വലിയ അംഗീകാരമായാണ് ഈ വിജയത്തെ ചലച്ചിത്ര ലോകം കാണുന്നത്. പുരസ്കാര ചടങ്ങിൽ നിർമ്മാതാവ് ഫർഹാൻ അക്തറും ഭാര്യ ഷിബാനി ദണ്ഡേക്കറും പങ്കെടുത്തു. ഇന്ത്യയുടെ തനതായ കഥകൾക്ക് ലോകവേദിയിൽ ലഭിക്കുന്ന ഈ അംഗീകാരം വരാനിരിക്കുന്ന ഓസ്കാർ മത്സരങ്ങളിലും ഇന്ത്യയുടെ പ്രതീക്ഷകൾ വർദ്ധിപ്പിക്കുന്നു.
Summary
The Manipuri film ‘Boong’, co-produced by Farhan Akhtar, has won the Best Children’s & Family Film award at BAFTA 2026.
