Follow on Google News
ന്യൂഡൽഹി: ഇന്ത്യൻ പാർലമെന്ററി ചരിത്രത്തിലെ ഏറ്റവും വലിയ മാറ്റത്തിന് വഴിയൊരുക്കി ലോക്സഭാ സീറ്റുകളുടെ എണ്ണം 850 ആയി വർധിപ്പിക്കാൻ കേന്ദ്രസർക്കാർ ഒരുങ്ങുന്നു (Lok Sabha Seats Increase 850). നിലവിലെ 543 സീറ്റുകളിൽ നിന്ന് സംസ്ഥാനങ്ങളിലെ സീറ്റുകൾ 815 ആയും കേന്ദ്രഭരണ പ്രദേശങ്ങളിലെ സീറ്റുകൾ 35 ആയും ഉയർത്താനാണ് ശുപാർശ. ഭരണഘടനയുടെ ആർട്ടിക്കിൾ 82 ഭേദഗതി ചെയ്യുന്നതിനുള്ള ബിൽ വരാനിരിക്കുന്ന പ്രത്യേക സമ്മേളനത്തിൽ അവതരിപ്പിക്കും.
1971-ലെ സെൻസസ് അടിസ്ഥാനമാക്കി തുടരുന്ന നിലവിലെ മണ്ഡല ഘടന മാറ്റുന്നതിനായി ആർട്ടിക്കിൾ 82-ലെ വ്യവസ്ഥകൾ നീക്കം ചെയ്യാൻ ബിൽ നിർദ്ദേശിക്കുന്നു. മണ്ഡലങ്ങൾ പുനർവിഭജിക്കുന്നതിനായി പ്രത്യേക കമ്മീഷൻ രൂപീകരിക്കും. സുപ്രീം കോടതിയിലെ ഒരു ജഡ്ജിയായിരിക്കും കമ്മീഷൻ അധ്യക്ഷൻ. മുഖ്യ തിരഞ്ഞെടുപ്പ് കമ്മീഷണറോ അദ്ദേഹം നിർദ്ദേശിക്കുന്ന പ്രതിനിധിയോ കമ്മീഷനിൽ അംഗമായിരിക്കും.
മണ്ഡല പുനർനിർണ്ണയം പൂർത്തിയാക്കിയ ശേഷമാകും വനിതാ സംവരണം നടപ്പിലാക്കുക.പുതുതായി നിലവിൽ വരുന്ന 850 സീറ്റുകളിൽ നിന്ന് മൂന്നിലൊന്ന് സീറ്റുകൾ (ഏകദേശം 283 സീറ്റുകൾ) വനിതകൾക്കായി സംവരണം ചെയ്യും. മണ്ഡല പുനർനിർണ്ണയത്തിന് ശേഷം മാത്രമേ സംവരണ മണ്ഡലങ്ങൾ ഏതൊക്കെയെന്ന കാര്യത്തിൽ വ്യക്തത വരികയുള്ളൂ.
ഏപ്രിൽ 16-ന് ആരംഭിക്കുന്ന പാർലമെന്റ് പ്രത്യേക സമ്മേളനത്തിൽ ഈ ബിൽ ഉൾപ്പെടെ മൂന്ന് പ്രധാന ബില്ലുകൾ അവതരിപ്പിക്കുമെന്നാണ് സൂചന. സീറ്റുകളുടെ എണ്ണത്തിൽ വരുന്ന ഈ വർദ്ധനവ് ദക്ഷിണേന്ത്യൻ സംസ്ഥാനങ്ങളും ഉത്തരേന്ത്യൻ സംസ്ഥാനങ്ങളും തമ്മിലുള്ള പ്രാതിനിധ്യ ചർച്ചകൾക്കും വഴിമരുന്നിട്ടേക്കാം.
Story Summary:
The Union Government is set to introduce a Constitutional Amendment Bill to increase Lok Sabha seats from 543 to 850. The proposal aims for 815 seats for states and 35 for union territories. According to the bill uploaded on the MPs’ portal, a Delimitation Commission chaired by a Supreme Court judge will be formed. Women’s reservation (one-third of the total 850 seats) will be implemented only after the delimitation process. The bill, which seeks to amend Article 82, will be introduced in the special session starting April 16, 2026.
