ന്യൂഡൽഹി: രാജ്യത്ത് ഇന്ധന മേഖലയിൽ വൻ വിപ്ലവത്തിനൊരുങ്ങി കേന്ദ്ര സർക്കാർ. പെട്രോളിൽ എഥനോൾ ചേർത്ത മാതൃകയിൽ ഡീസലിൽ 15 ശതമാനം വരെ ‘ഐസോബ്യൂട്ടനോൾ’ (Diesel Isobutanol Blending India Nitin Gadkari) ചേർത്ത് ഉപയോഗിക്കാൻ ഇന്ത്യ തയ്യാറെടുക്കുന്നതായി കേന്ദ്ര റോഡ് ഗതാഗത-ഹൈവേ മന്ത്രി നിതിൻ ഗഡ്കരി വ്യക്തമാക്കി. എഥനോൾ നേരിട്ട് ഡീസലിൽ ലയിക്കില്ല എന്ന സാങ്കേതിക തടസ്സമുള്ളതിനാലാണ് എഥനോളിൽ നിന്ന് ഐസോബ്യൂട്ടനോൾ ഉത്പാദിപ്പിച്ച് ഡീസലിനൊപ്പം ചേർക്കാനുള്ള പുതിയ ബദൽ ശ്രമങ്ങൾ സർക്കാർ ഊർജ്ജിതമാക്കിയത്.
ഭാവിയിൽ ഡീസലിന് പകരമുള്ള ഏറ്റവും മികച്ചതും പരിസ്ഥിതി സൗഹൃദവുമായ ഇന്ധന മിശ്രിതമായി ഇത് മാറുമെന്നും മന്ത്രി പറഞ്ഞു. ഇന്ത്യയുടെ ഊർജ്ജസ്വയംപര്യാപ്തതയിലേക്കും പുകമലിനീകരണം വൻതോതിൽ കുറയ്ക്കുന്നതിലേക്കുമുള്ള പ്രധാന ചുവടുവെയ്പ്പാണിത്. ഈ സാങ്കേതികവിദ്യയുടെ ഭാഗമായി രാജ്യത്ത് നടത്തിയ പൈലറ്റ് പ്രകടനങ്ങൾ (Pilot runs) എല്ലാം തന്നെ വൻ വിജയകരമായ ഫലങ്ങളാണ് നൽകിയിട്ടുള്ളതെന്നും കേന്ദ്രമന്ത്രി ചൂണ്ടിക്കാട്ടി.
പുതിയ ഇന്ധന സാങ്കേതികവിദ്യയുടെ പരീക്ഷണാർത്ഥം 100 ശതമാനം എഥനോളിലും ഐസോബ്യൂട്ടനോളിലും പ്രവർത്തിക്കുന്ന രണ്ട് ജനറേറ്റർ സെറ്റുകൾ വിജയകരമായി പ്രവർത്തിപ്പിച്ചു കഴിഞ്ഞു. ഇത്തരം ജൈവ ഇന്ധനങ്ങൾ ഉപയോഗിച്ച് സുഗമമായി പ്രവർത്തിക്കാൻ കഴിയുന്ന വലിപ്പമേറിയ എഞ്ചിനുകൾ ഇന്ത്യയിൽ നിർമ്മിക്കാൻ സാധിക്കുമെന്നാണ് ഈ പരീക്ഷണം തെളിയിക്കുന്നത്. ഇത് വഴി ഇന്ത്യയുടെ വിദേശ അസംസ്കൃത എണ്ണ (Crude Oil) ഇറക്കുമതി വീണ്ടും വൻതോതിൽ കുറയ്ക്കാനും അതുവഴി രാജ്യത്തിന് കോടിക്കണക്കിന് രൂപ ലാഭിക്കാനും സാധിക്കുമെന്നും മന്ത്രി നിതിൻ ഗഡ്കരി വ്യക്തമാക്കി.
Story Summary:
Union Minister for Road Transport and Highways Nitin Gadkari announced that India is preparing to blend up to 15% Isobutanol with diesel, similar to the ethanol blending in petrol. Due to technical limitations in directly mixing ethanol with diesel, the government is focusing on producing isobutanol from ethanol. Successful pilot tests have already run generator sets on 100% ethanol and isobutanol, which will significantly cut India’s crude oil imports and reduce pollution.
