ന്യൂഡൽഹി: ലണ്ടനിലെ സർവകലാശാലയിൽ നടന്ന പരിപാടിക്കിടെ, ഇന്ത്യൻ ചീഫ് ജസ്റ്റിസ് സൂര്യ കാന്തിന് നേരെ ചോദ്യങ്ങളുമായി സദസ്സിലെത്തിയവർ. ഇന്ത്യയിലെ ജനാധിപത്യപരമായ വിയോജിപ്പുകൾ അടിച്ചമർത്തപ്പെടുന്നുവെന്ന ആരോപണങ്ങളെക്കുറിച്ചുള്ള ചോദ്യം ഉന്നയിക്കാൻ ശ്രമിച്ചതാണ് സംഘർഷത്തിനും തർക്കത്തിനും വഴിവെച്ചത്.(CJI Surya Kant faces protests in London)
പരിപാടിയുടെ ഭാഗമായുള്ള സംവാദത്തിനിടെ, സദസ്സിലുണ്ടായിരുന്ന ഒരു വിദ്യാർത്ഥിനി ചീഫ് ജസ്റ്റിസിനോട് ചോദ്യം ചോദിക്കാൻ എഴുന്നേറ്റു. ഇന്ത്യയിൽ വിയോജിപ്പുകൾക്കെതിരായ ശത്രുത വർദ്ധിക്കുന്നുവെന്നും, ഇത്തരം മനോഭാവം ചീഫ് ജസ്റ്റിസിന്റെ സമീപകാല പ്രസംഗങ്ങളിലും പ്രതിഫലിക്കുന്നുണ്ടെന്നും അവർ ചൂണ്ടിക്കാട്ടി. എന്നാൽ, ചോദ്യം പൂർത്തിയാക്കുന്നതിന് മുൻപ് തന്നെ വേദിയിലുണ്ടായിരുന്നവർ ഇടപെട്ടു. ചർച്ചാവിഷയം ‘ആർട്ടിഫിഷ്യൽ ഇന്റലിജൻസും അന്താരാഷ്ട്ര നിയമവും’ ആണെന്നും അതിനാൽ ഈ ചോദ്യം അനുവദിക്കാനാവില്ലെന്നും പറഞ്ഞ് അവർ അത് തടസ്സപ്പെടുത്തി.
ഇതോടെ സദസ്സിൽ ബഹളമുണ്ടാകുകയും, മാന്യമായ പെരുമാറ്റം വേണമെന്ന് ആവശ്യപ്പെട്ട് വിദ്യാർത്ഥികൾ പ്രതികരിക്കുകയും ചെയ്തു. ഈ സംഭവത്തിന്റെ വീഡിയോ ക്ലിപ്പുകൾ ‘കോക്റോച്ച് ജനതാ പാർട്ടി’ വക്താവ് സൗരവ് ദാസ് ഉൾപ്പെടെയുള്ളവർ സമൂഹമാധ്യമങ്ങളിൽ പങ്കുവെച്ചിട്ടുണ്ട്. ‘ആർട്ടിഫിഷ്യൽ ഇന്റലിജൻസും അന്താരാഷ്ട്ര നിയമവും’ എന്ന വിഷയത്തിലായിരുന്നു ചീഫ് ജസ്റ്റിസ് സൂര്യ കാന്തിന്റെ പ്രഭാഷണം. സാങ്കേതികവിദ്യയുടെ വളർച്ചയിൽ നിയമത്തിന്റെ പങ്ക് സുപ്രധാനമാണെന്നും, സാങ്കേതിക ശക്തി ഭരണഘടനാപരമായ മൂല്യങ്ങൾക്കും ജനാധിപത്യത്തിനും മനുഷ്യ അന്തസ്സിനും വിധേയമായിരിക്കണമെന്നും അദ്ദേഹം ഊന്നിപ്പറഞ്ഞു. തീരുമാനം എടുക്കുന്ന പ്രക്രിയകളിൽ അൽഗോരിതങ്ങൾ ഇടപെടുമ്പോൾ നിയമപരമായ ഉത്തരവാദിത്തം നിലനിർത്തേണ്ടത് അനിവാര്യമാണെന്നും അദ്ദേഹം കൂട്ടിച്ചേർത്തു. ആറുദിവസത്തെ യുകെ സന്ദർശനത്തിന്റെ ഭാഗമായാണ് അദ്ദേഹം ലണ്ടനിലെത്തിയത്.
Story Summary
A tense standoff occurred at a London university event where Chief Justice of India Surya Kant was speaking, after attendees attempted to question him regarding alleged suppression of dissent in India. The organizers blocked the questions, citing that they were off-topic from the scheduled lecture on Artificial Intelligence, leading to protests from the audience.
