ബെംഗളൂരു: ഐടി നഗരമായ ബെംഗളൂരുവിൽ ഹോട്ടൽ ഭക്ഷണസാധനങ്ങളുടെ വില കുത്തനെ കൂടിയേക്കുമെന്ന് സൂചന (Bengaluru hotel price hike). കുറഞ്ഞ വേതന നിരക്കിലെ വർദ്ധനവ്, ഇന്ധനവില വർദ്ധനവ് എന്നിവയെത്തുടർന്ന് ഹോട്ടൽ വിഭവങ്ങൾക്ക് 60 ശതമാനം വരെ വില കൂട്ടാൻ ബെംഗളൂരുവിലെ ഹോട്ടലുടമകൾ ആലോചിക്കുന്നതായാണ് റിപ്പോർട്ട്. ഇതോടെ നഗരത്തിലെ സാധാരണക്കാരായ ജനങ്ങളുടെ പോക്കറ്റ് ചോരുമെന്നുറപ്പായി.
പുതിയ വിലവർദ്ധനവ് നിലവിൽ വരികയാണെങ്കിൽ നിലവിൽ 80 മുതൽ 90 രൂപ വരെ വിലയുള്ള ഒരു പ്ലേറ്റ് മസാല ദോശയ്ക്ക് വരും ദിവസങ്ങളിൽ 150 രൂപ വരെ നൽകേണ്ടി വരും. അതുപോലെ പല പ്രമുഖ ഹോട്ടലുകളിലും ബിരിയാണിയുടെ വില 500 രൂപ വരെയായി ഉയർന്നേക്കാമെന്നും ഹോട്ടലുടമകളുടെ സംഘടനകൾ സൂചന നൽകുന്നു. പാചകവാതക നിരക്ക്, പച്ചക്കറി ഉൾപ്പെടെയുള്ള അവശ്യസാധനങ്ങളുടെ വിലക്കയറ്റം, ജീവനക്കാരുടെ ശമ്പളവർദ്ധനവ് എന്നിവ കാരണം നിലവിലെ നിരക്കിൽ ഹോട്ടലുകൾ മുന്നോട്ട് കൊണ്ടുപോകാൻ കഴിയില്ലെന്നാണ് ഇവരുടെ വാദം.
വരും ദിവസങ്ങളിൽ ഹോട്ടലുടമകളുടെ അസോസിയേഷൻ യോഗം ചേർന്ന് വില വർദ്ധനവിന്റെ കാര്യത്തിൽ അന്തിമ തീരുമാനമെടുക്കും. ബെംഗളൂരുവിലെ ഐടി ജീവനക്കാരെയും സാധാരണക്കാരായ തൊഴിലാളികളെയും വിദ്യാർത്ഥികളെയും ഒരുപോലെ ബാധിക്കുന്നതാണ് ഈ പുതിയ നീക്കം. പുറത്തുനിന്നുള്ള ഭക്ഷണത്തെ പ്രധാനമായും ആശ്രയിക്കുന്ന വലിയൊരു വിഭാഗം ജനങ്ങൾക്ക് ഇത് കനത്ത തിരിച്ചടിയാകും.
Short Story Summary: Hoteliers in Bengaluru are hinting at a steep price rise of up to 60% for restaurant food, potentially pushing the cost of a masala dosa to Rs 150 and a biryani to Rs 500. The restaurant owners attribute this imminent hike to the recent increase in minimum wages for staff, surging commercial fuel prices, and the rising cost of essential commodities. The Bengaluru Hotel Owners’ Association is expected to hold a meeting soon to finalize the updated tariff structure.
