ന്യൂഡൽഹി: റഷ്യയിൽ തൊഴിൽ തേടിപ്പോയി ഉക്രെയ്ൻ യുദ്ധമുഖത്ത് അകപ്പെട്ട പത്ത് ഇന്ത്യൻ പൗരന്മാർ കൊല്ലപ്പെട്ടതായി കേന്ദ്രസർക്കാർ സുപ്രീംകോടതിയെ അറിയിച്ചു. റഷ്യൻ സേനയുടെ ഭാഗമായി യുദ്ധം ചെയ്തവരാണ് ഇവർ. ഇതിൽ ഭൂരിഭാഗം പേരും സ്വന്തം താല്പര്യപ്രകാരം കരാറുകളിൽ ഏർപ്പെട്ടതാണെന്നും സർക്കാർ കോടതിയിൽ വ്യക്തമാക്കി.(10 Indians In Russia Died Fighting Ukraine War, Centre Tells Supreme Court)
ജോലി വാഗ്ദാനം ചെയ്ത് റഷ്യയിലെത്തിച്ച ശേഷം നിർബന്ധപൂർവ്വം യുദ്ധത്തിന് നിയോഗിക്കപ്പെട്ട 26 ഇന്ത്യക്കാരുടെ കുടുംബാംഗങ്ങൾ നൽകിയ ഹർജി പരിഗണിക്കുകയായിരുന്നു കോടതി. ചീഫ് ജസ്റ്റിസ്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വിപുൽ പാഞ്ചോലി എന്നിവരടങ്ങിയ ബെഞ്ചാണ് കേസ് കേട്ടത്. ഹർജിയിൽ പരാമർശിക്കുന്ന 26 പേരിൽ 10 പേർ നിർഭാഗ്യവശാൽ കൊല്ലപ്പെട്ടു. ഒരാൾ ക്രിമിനൽ കേസിൽ ജയിലിലും മറ്റൊരാൾ സ്വന്തം താല്പര്യപ്രകാരം റഷ്യയിൽ തുടരുകയുമാണ്.
കൊല്ലപ്പെട്ടവരുടെ മൃതദേഹങ്ങൾ നാട്ടിലെത്തിക്കാൻ വിദേശകാര്യ മന്ത്രാലയം തീവ്രശ്രമം നടത്തുന്നുണ്ട്. എന്നാൽ ചില കുടുംബങ്ങൾ സഹകരിക്കുന്നില്ലെന്ന് അഡീഷണൽ സോളിസിറ്റർ ജനറൽ ഐശ്വര്യ ഭാട്ടി ആരോപിച്ചു. മൃതദേഹം ഏറ്റെടുക്കാൻ തയ്യാറാകാതെ കോടതിയെ സമീപിക്കുന്ന സമീപനമാണ് ചിലർ സ്വീകരിക്കുന്നതെന്നും സർക്കാർ കുറ്റപ്പെടുത്തി. പലരും സ്വന്തം ഇഷ്ടപ്രകാരം റഷ്യൻ ഏജൻസികളുമായി കരാറിൽ ഏർപ്പെട്ടവരാണ്. എങ്കിലും ഏജന്റുമാർ പലരെയും തെറ്റിദ്ധരിപ്പിച്ച സംഭവങ്ങളുണ്ടെന്നും ഇത്തരമൊരു ഏജന്റിനെ അറസ്റ്റ് ചെയ്തിട്ടുണ്ടെന്നും സർക്കാർ അറിയിച്ചു.
എന്നാൽ സർക്കാരിന്റെ വാദങ്ങൾ ഹർജിക്കാർ നിഷേധിച്ചു. തങ്ങളുടെ പാസ്പോർട്ടുകൾ പിടിച്ചുവെച്ച ശേഷം നിർബന്ധപൂർവ്വം യുദ്ധത്തിന് അയക്കുകയായിരുന്നുവെന്ന് അവർ പറഞ്ഞു. വിദേശകാര്യ മന്ത്രാലയം തങ്ങളെ ബന്ധപ്പെടുന്നില്ലെന്നും ഡിഎൻഎ സാമ്പിളുകൾ ശേഖരിക്കാൻ പോലും തയ്യാറാകുന്നില്ലെന്നും കുടുംബാംഗങ്ങളുടെ അഭിഭാഷകൻ കോടതിയിൽ വാദിച്ചു. യുദ്ധമുഖത്തെ ദുരിതങ്ങൾ വിവരിക്കുന്ന ഒരു വീഡിയോയും കുടുംബം കോടതിക്ക് കൈമാറി. യുദ്ധമേഖലയിൽ നിന്ന് മൃതദേഹങ്ങൾ കണ്ടെത്തുക എന്നത് പ്രായോഗികമായി വലിയ ബുദ്ധിമുട്ടുള്ള കാര്യമാണെന്ന് ചീഫ് ജസ്റ്റിസ് നിരീക്ഷിച്ചു. വിഷയം വളരെ നയപരമായി കൈകാര്യം ചെയ്യേണ്ടതാണെന്നും അദ്ദേഹം പറഞ്ഞു. നിലവിലെ സാഹചര്യവും ഇതുവരെ സ്വീകരിച്ച നടപടികളും വ്യക്തമാക്കി വിശദമായ റിപ്പോർട്ട് സമർപ്പിക്കാൻ വിദേശകാര്യ മന്ത്രാലയത്തിന് സുപ്രീംകോടതി നിർദ്ദേശം നൽകി. നിലവിൽ ഏകദേശം 215 ഇന്ത്യക്കാർ റഷ്യയിൽ ഇത്തരത്തിൽ കുടുങ്ങിക്കിടക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്. ഇവരെ തിരികെ എത്തിക്കാനുള്ള നയതന്ത്ര നീക്കങ്ങൾ തുടരുകയാണ്.
