മേക്കപ്പ് ചെയ്യുന്നതിൽ ശരിയോ തെറ്റോ ആയ രീതികളില്ല. എന്നാൽ നിങ്ങളുടെ സൗന്ദര്യവർദ്ധക ദിനചര്യ കൂടുതൽ ലളിതമാക്കാൻ ചില നുറുങ്ങുവിദ്യകൾ സഹായിക്കുമെങ്കിൽ അത് പരീക്ഷിക്കുന്നതിൽ തെറ്റില്ലല്ലോ ( Makeup Tips and Hacks). ഇന്റർനെറ്റിൽ ധാരാളം മേക്കപ്പ് ടിപ്സുകൾ ലഭ്യമാണെങ്കിലും അതിൽ പ്രായോഗികമായവ കണ്ടെത്തുക പ്രയാസമാണ്. മുഖം, കണ്ണുകൾ, ചുണ്ടുകൾ എന്നിവയുടെ മേക്കപ്പ് കൂടുതൽ മനോഹരമാക്കാൻ സഹായിക്കുന്ന തികച്ചും ഫലപ്രദമായ ചില കാര്യങ്ങൾ താഴെ നൽകുന്നു.
1. കൺപീലികൾക്ക് കൂടുതൽ ഉന്മേഷം നൽകാൻ
നിങ്ങൾക്ക് പീലികൾ കുറവാണെന്ന് തോന്നുന്നുണ്ടെങ്കിൽ മസ്കാര ഉപയോഗിക്കുന്നതിന് മുമ്പ് ഈ വിദ്യ പരീക്ഷിക്കുക. ഒരു ബ്രഷ് ഉപയോഗിച്ച് അല്പം ലൂസ് പൗഡർ പീലികളിൽ പതുക്കെ തൂവുക. ഇതിന് മുകളിലായി മസ്കാരയുടെ കട്ടിയുള്ള കോട്ടുകൾ നൽകുക. ഇത് പീലികൾക്ക് കൂടുതൽ കനവും ഭംഗിയും നൽകാൻ സഹായിക്കും. ഐലൈനറും കാജലും കൂടി ഉപയോഗിക്കുന്നതോടെ കണ്ണുകൾക്ക് കൂടുതൽ മിഴിപ്പേകാം.
2. ലിപ്സ്റ്റിക് കൂടുതൽ സമയം നിലനിൽക്കാൻ
ലിപ്സ്റ്റിക് പെട്ടെന്ന് മാഞ്ഞുപോകുന്നത് പലരെയും അലട്ടുന്ന പ്രശ്നമാണ്. ഇത് ഒഴിവാക്കാൻ ആദ്യം ഒരു ലിപ് ലൈനർ ഉപയോഗിച്ച് ചുണ്ടുകൾ വരയ്ക്കുക. തുടർന്ന് ലിപ്സ്റ്റിക് ഉപയോഗിക്കാം. ഇതിനുശേഷം ചുണ്ടുകൾക്ക് മുകളിൽ ഒരു ടിഷ്യൂ പേപ്പർ വെച്ച് അതിലൂടെ അല്പം ലൂസ് പൗഡർ ബ്രഷ് ചെയ്യുക. ഇത് ലിപ്സ്റ്റിക്കിനെ മാറ്റാത്ത രീതിയിൽ ഉറപ്പിച്ചു നിർത്താനും കൂടുതൽ സമയം മായാതെ ഇരിക്കാനും സഹായിക്കും.
3. തിളങ്ങുന്ന ചർമ്മത്തിനായി ‘സ്ട്രോബിംഗ് ക്രീം’
ഫൗണ്ടേഷൻ ഇടുന്നതിന് മുമ്പ് അല്പം സ്ട്രോബിംഗ് ക്രീം ഉപയോഗിക്കുന്നത് ചർമ്മത്തിന് സ്വാഭാവികമായ തിളക്കം നൽകും. നിങ്ങളുടെ പക്കൽ ഇത് ഇല്ലെങ്കിൽ, അല്പം ലിപ് ബാമിൽ കുറച്ച് റോസ് ഗോൾഡ് ഐഷാഡോയോ ഹൈലൈറ്ററോ ചേർത്ത് നന്നായി യോജിപ്പിക്കുക. ഇത് മുഖത്ത് പുരട്ടുന്നത് പ്രകൃതിദത്തമായ തിളക്കം നൽകാൻ സഹായിക്കും.
4. പുരികങ്ങൾ മനോഹരമാക്കാൻ
മുഖത്തിന്റെ ഘടന തന്നെ മാറ്റാൻ കൃത്യമായി വരച്ച പുരികങ്ങൾക്ക് സാധിക്കും. പുരികം ഒരു സ്പൂളി (Spoolie) ഉപയോഗിച്ച് ചീകി വൃത്തിയാക്കിയ ശേഷം മാത്രം എഴുതാൻ തുടങ്ങുക. നിങ്ങളുടെ മുടിയുടെ നിറത്തേക്കാൾ അല്പം കുറഞ്ഞ ഷേഡുള്ള ഐബ്രോ പെൻസിൽ തിരഞ്ഞെടുക്കുന്നത് പുരികങ്ങൾക്ക് സ്വാഭാവികത നൽകും. പുരികങ്ങൾ ഒരേ രീതിയിൽ ഇരിക്കാൻ മസ്കാര ബ്രഷിലെ അധികമായ മഷി കളഞ്ഞ ശേഷം പതുക്കെ ബ്രഷ് ചെയ്യുന്നതും നല്ലതാണ്.
5. കണ്ണിന്റെ ഉൾവശം ഹൈലൈറ്റ് ചെയ്യുക
കണ്ണുകൾക്ക് കൂടുതൽ തെളിച്ചം തോന്നാൻ ഐ മേക്കപ്പിന് ശേഷം ഹൈലൈറ്റർ ഉപയോഗിച്ച് കണ്ണിന്റെ ഉൾവശത്തെ കോണുകളിൽ ചെറിയൊരു തിളക്കം നൽകുക. ഇത് കണ്ണുകൾ കൂടുതൽ വിടർന്നതും ഉന്മേഷമുള്ളതുമായി തോന്നിക്കാൻ സഹായിക്കും.
