നമ്മുടെ ബോധമനസ്സിന്റെയും ചിന്തകളുടെയും സ്രഷ്ടാവായ മസ്തിഷ്കത്തെ പ്രായമേറുമ്പോഴും യുവത്വത്തോടെ നിലനിർത്താൻ ലളിതമായ ചില ശീലങ്ങൾ സഹായിക്കും (Brain Health Protection Tips). മറവിരോഗങ്ങൾ ഉൾപ്പെടെയുള്ള വെല്ലുവിളികൾ വർദ്ധിച്ചുവരുന്ന ഈ കാലഘട്ടത്തിൽ, സങ്കീർണ്ണമായ ചികിത്സാരീതികൾക്ക് പകരം ദൈനംദിന ജീവിതത്തിൽ വരുത്താവുന്ന ചെറിയ മാറ്റങ്ങളിലൂടെ തലച്ചോറിനെ എങ്ങനെ സംരക്ഷിക്കാം എന്നതിനെക്കുറിച്ച് ഒരു വിദഗ്ധ ന്യൂറോളജിസ്റ്റ് നൽകുന്ന നിർദ്ദേശങ്ങൾ താഴെ പറയുന്നവയാണ്.
1. ഫിറ്റ്നസ് സ്നാക്കിംഗ് (Fitness Snacking): തലച്ചോറിലെ കോശങ്ങളുടെ വളർച്ചയ്ക്കും സംരക്ഷണത്തിനും സഹായിക്കുന്ന ‘BDNF’ എന്ന പ്രോട്ടീൻ വ്യായാമത്തിലൂടെ ഉത്പാദിപ്പിക്കപ്പെടുന്നു. ഇതിനായി മണിക്കൂറുകളോളം ജിമ്മിൽ ചെലവഴിക്കണമെന്നില്ല. തിരക്കുള്ള ദിവസങ്ങളിൽ ജോലിക്ക് ഇടയിൽ 10 മിനിറ്റ് ഓടുകയോ വേഗത്തിൽ നടക്കുകയോ ചെയ്യുന്നത് വഴി ‘വ്യായാമം സ്നാക്ക്സ്’ പോലെ ചെറിയ അളവിൽ പലതവണയായി ചെയ്യാം. ഇത് അൽഷിമേഴ്സ് പോലുള്ള രോഗങ്ങളെ തടയാൻ സഹായിക്കും.
2. ഗൂഗിൾ മാപ്സിനെ അമിതമായി ആശ്രയിക്കരുത്: സാങ്കേതികവിദ്യയുടെ അമിത ഉപയോഗം തലച്ചോറിനെ മടിയനാക്കുന്നു. ഗൂഗിൾ മാപ്സ് നോക്കാതെ തന്നെ വഴി കണ്ടെത്താൻ ശ്രമിക്കുന്നത് വഴി ‘കോഗ്നിറ്റീവ് റിസർവ്’ (Cognitive Reserve) വർദ്ധിപ്പിക്കാം. പുതിയ കാര്യങ്ങൾ പഠിക്കുന്നതും തലച്ചോറിന് ചെറിയ വെല്ലുവിളികൾ നൽകുന്നതും കോശങ്ങൾ തമ്മിലുള്ള ബന്ധം ശക്തമാക്കും.
3. ഉച്ചയ്ക്ക് ശേഷം കഫീൻ ഒഴിവാക്കുക: ഉച്ചയ്ക്ക് ഒരു മണിക്ക് ശേഷം കാപ്പി കുടിക്കുന്നത് ഒഴിവാക്കണമെന്ന് ഡോ. ബെഗെറ്റി നിർദ്ദേശിക്കുന്നു. ഉച്ചകഴിഞ്ഞ് കാപ്പി കുടിക്കുന്നത് ഉറക്കത്തിന്റെ ഗുണനിലവാരം 7% കുറയ്ക്കുന്നു. കൃത്യമായ ഉറക്കം ലഭിക്കാത്തത് തലച്ചോറിലെ മാലിന്യങ്ങൾ (വിഷാംശമുള്ള പ്രോട്ടീനുകൾ) നീക്കം ചെയ്യുന്ന പ്രക്രിയയെ തടസ്സപ്പെടുത്തും.
4. സൂര്യപ്രകാശവും നടത്തവും: വർക്ക് ഫ്രം ഹോം ചെയ്യുന്നവർ രാവിലെ തന്നെ പുറത്തിറങ്ങി അല്പനേരം നടക്കുന്നത് ശീലമാക്കണം. രാവിലെ സൂര്യപ്രകാശം ഏൽക്കുന്നത് ഉറക്കത്തെ നിയന്ത്രിക്കുന്ന ശാരീരിക ചക്രം (Sleep-wake cycle) ക്രമീകരിക്കാൻ സഹായിക്കും. പ്രകൃതിയുമായി ഇണങ്ങിയുള്ള നടത്തം മാനസിക സമ്മർദ്ദം കുറയ്ക്കുകയും തലച്ചോറിലെ വികാരങ്ങളെ നിയന്ത്രിക്കുന്ന ‘അമിഗ്ദല’ (Amygdala) എന്ന ഭാഗത്തിന്റെ അമിത പ്രവർത്തനം കുറയ്ക്കുകയും ചെയ്യും.
5. മദ്യപാനം കുറയ്ക്കുക: മദ്യപാനം തലച്ചോറിലെ ബാലൻസിനെ നിയന്ത്രിക്കുന്ന ‘സെറിബെല്ലം’ എന്ന ഭാഗത്തെ ചുരുങ്ങാൻ കാരണമാകുന്നു. ദിവസവും ഒന്നോ രണ്ടോ ഗ്ലാസ് വൈൻ കുടിക്കുന്നത് പോലും ദീർഘകാലാടിസ്ഥാനത്തിൽ ദോഷകരമാണ്. മദ്യപാനം ഒരു ശീലമാക്കുന്നതിന് പകരം അപൂർവ്വമായ അവസരങ്ങളിൽ മാത്രം ഉപയോഗിക്കുന്ന ഒന്നായി മാറ്റുക.
