കോഴിക്കോട്: നാദാപുരം-പെരിങ്ങത്തൂർ സംസ്ഥാന പാതയിലെ ചേറ്റു വെട്ടിയിൽ കാട്ടുപന്നി കാറിനടിയിൽ കുടുങ്ങിയതിനെത്തുടർന്ന് യാത്രക്കാരായ കുടുംബം മണിക്കൂറുകളോളം ആശങ്കയിലായി. കൊടുവള്ളി സ്വദേശികളായ കുടുംബമാണ് കാറിനുള്ളിൽ കുടുങ്ങിയത്.(Wild boar gets stuck under car, Family trapped)
കഴിഞ്ഞ ദിവസം രാത്രിയോടെയാണ് സംഭവം. റോഡ് മുറിച്ചുകടക്കുകയായിരുന്ന പത്തോളം വരുന്ന കാട്ടുപന്നിക്കൂട്ടത്തിന് ഇടയിലേക്ക് കാർ അകപ്പെടുകയായിരുന്നു. കൂട്ടത്തിലുണ്ടായിരുന്ന ഒരു വലിയ പന്നി കാറിനടിയിൽ കുടുങ്ങി. പന്നി പുറത്തിറങ്ങാൻ വെപ്രാളം കാട്ടിയതോടെ കാർ ഇളകാനും തകരാറിലാകാനും തുടങ്ങി.
ആക്രമിക്കുമോ എന്ന ഭയത്താലും കാറിന്റെ വാതിലുകൾ തുറക്കാൻ കഴിയാത്തതിനാലും കുടുംബം ഒരു മണിക്കൂറോളം ഉള്ളിൽത്തന്നെ ഇരുന്നു. ഒടുവിൽ നാദാപുരം പോലീസും, ഫയർഫോഴ്സും, വനംവകുപ്പ് ഉദ്യോഗസ്ഥരും സ്ഥലത്തെത്തി. ഏറെ നേരത്തെ പരിശ്രമത്തിനൊടുവിലാണ് പന്നിയെ പുറത്തെടുത്തത്.
