തിരുവനന്തപുരം: എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശനെ പത്മഭൂഷൺ നൽകി ആദരിക്കാനുള്ള കേന്ദ്ര നീക്കത്തിനെതിരെ പ്രതിഷേധം ശക്തമാകുന്നു (Vellappally Natesan Padma Bhushan). സേവ് യൂണിവേഴ്സിറ്റി ക്യാമ്പയിൻ കമ്മിറ്റി നൽകിയ പരാതിയിൽ രാഷ്ട്രപതി ദ്രൗപതി മുർമു ഇടപെട്ടു. പരാതി പരിശോധിച്ച് ആവശ്യമായ മേൽനടപടികൾ സ്വീകരിക്കാൻ രാഷ്ട്രപതിയുടെ ഓഫീസ് കേന്ദ്ര ആഭ്യന്തര മന്ത്രാലയത്തിന് നിർദ്ദേശം നൽകി.
മുൻപ് പത്മ പുരസ്കാരങ്ങളെ പരസ്യമായി അധിക്ഷേപിച്ച വ്യക്തിക്ക് അതേ പുരസ്കാരം നൽകുന്നത് പുനഃപരിശോധിക്കണമെന്ന് സമിതി ആവശ്യപ്പെട്ടു. ക്രിമിനൽ കേസുകളിൽ പ്രതിയായ ഒരാൾക്ക് രാജ്യത്തിന്റെ പരമോന്നത ബഹുമതി നൽകുന്നത് ഉചിതമല്ലെന്ന് പരാതിയിൽ ചൂണ്ടിക്കാട്ടുന്നു.
വെള്ളാപ്പള്ളിക്ക് പുരസ്കാരം നൽകാനുള്ള തീരുമാനം അർഹരായവർക്ക് ചെയ്യുന്ന അനീതിയാണെന്നും സമിതി ആരോപിച്ചു.
പരാതി ആഭ്യന്തര വകുപ്പിന് കൈമാറിയ വിവരം രാഷ്ട്രപതിയുടെ ഓഫീസിൽ നിന്ന് പരാതിക്കാരെ ഔദ്യോഗികമായി അറിയിച്ചിട്ടുണ്ട്. കേന്ദ്ര ആഭ്യന്തര മന്ത്രാലയം ഇക്കാര്യത്തിൽ സ്വീകരിക്കുന്ന നിലപാട് വെള്ളാപ്പള്ളി നടേശന്റെ പുരസ്കാര ലബ്ധിയിൽ നിർണ്ണായകമാകും.
