Follow on Google News
പാലക്കാട്: പാലക്കാട് നിയമസഭാ തിരഞ്ഞെടുപ്പുമായി ബന്ധപ്പെട്ട വോട്ടിന് പണം നൽകിയെന്ന വിവാദത്തിൽ ബിജെപി നേതാവ് ശോഭ സുരേന്ദ്രനെതിരെ പോലീസിൽ പരാതി (Sobha Surendran Controversy Palakkad). ബിജെപി മുൻ ആലപ്പുഴ നോർത്ത് ജില്ലാ വൈസ് പ്രസിഡന്റ് ബിന്ദു വിനയകുമാറാണ് പാലക്കാട് ജില്ലാ പോലീസ് മേധാവിക്ക് പരാതി നൽകിയത്. ശോഭ സുരേന്ദ്രൻ ഫോണിൽ വിളിച്ച് തന്നെ അസഭ്യം പറയുകയും കരണത്തടിക്കുമെന്ന് ഭീഷണിപ്പെടുത്തുകയും ചെയ്തതായി ബിന്ദു ആരോപിച്ചു.
പാലക്കാട് വോട്ടിനായി പണമെത്തിച്ചത് ബിന്ദുവാണെന്ന് ശോഭ സുരേന്ദ്രൻ ആരോപിച്ചിരുന്നു. എന്നാൽ ഈ ആരോപണം അടിസ്ഥാനരഹിതമാണെന്നും പാലക്കാട്ടെ പരാജയഭീതിയിൽ കുറ്റം മറ്റാരുടെയെങ്കിലും തലയിൽ കെട്ടിവെക്കാനുള്ള ശ്രമമാണ് ശോഭ നടത്തുന്നതെന്നും ബിന്ദു പറഞ്ഞു. ശോഭ സുരേന്ദ്രൻ തന്നെ ഭീഷണിപ്പെടുത്തുന്ന ഫോൺ റെക്കോർഡും ബിന്ദു പുറത്തുവിട്ടു. ശോഭയുടെ പക്ഷത്തേക്ക് വരാത്തതിലുള്ള വ്യക്തിവൈരാഗ്യമാണ് ഇതിന് പിന്നിലെന്നും അവർ വ്യക്തമാക്കി.
ആലപ്പുഴയിൽ ശോഭ സുരേന്ദ്രൻ അനധികൃതമായി പണം പിരിക്കുന്നുവെന്ന് ജില്ലാ പ്രസിഡന്റ് സംസ്ഥാന നേതൃത്വത്തിന് പരാതി നൽകിയിരുന്നതായും ബിന്ദു വെളിപ്പെടുത്തി. ശോഭയുടെ ധാർഷ്ട്യത്തിന് മുന്നിൽ സംസ്ഥാന നേതൃത്വം നോക്കുകുത്തിയായി നിൽക്കുകയാണെന്നും, തനിക്കെതിരെയുള്ള ആരോപണങ്ങൾ തെളിയിക്കാൻ ശോഭയെ വെല്ലുവിളിക്കുന്നുവെന്നും ബിന്ദു കൂട്ടിച്ചേർത്തു. ബിജെപിയിലെ ആഭ്യന്തര കലഹം ഇതോടെ പുതിയ തലത്തിലേക്ക് നീങ്ങിയിരിക്കുകയാണ്.
Summary: Former BJP Alappuzha North District Vice President Bindu Vinayakumar has filed a police complaint against Sobha Surendran, alleging telephonic threats and verbal abuse. The dispute arose following the “cash-for-vote” controversy in Palakkad, where Sobha allegedly accused Bindu of transporting the money. Bindu released an audio clip of the threatening call and challenged Sobha to prove the allegations, while also exposing internal rifts within the BJP’s state and district leadership.
