കൊച്ചി: ശബരിമല വിമാനത്താവളത്തിനായി ചെറുവള്ളി എസ്റ്റേറ്റും പരിസരപ്രദേശങ്ങളും ഏറ്റെടുക്കാനുള്ള വിജ്ഞാപനം റദ്ദാക്കിയ സിംഗിൾ ബെഞ്ച് ഉത്തരവിനെതിരെ സംസ്ഥാന സർക്കാർ ഹൈക്കോടതിയിൽ അപ്പീൽ ഫയൽ ചെയ്തു. പദ്ധതിക്കായി 2,570 ഏക്കർ ഭൂമി ഏറ്റെടുക്കാനുള്ള സർക്കാരിന്റെ നീക്കത്തിനാണ് സിംഗിൾ ബെഞ്ച് നേരത്തെ തടയിട്ടത്.(Sabarimala Airport, Government appeals in High Court against stay on land acquisition)
ഇത്രയും വലിയ വിസ്തൃതിയിലുള്ള ഭൂമി വിമാനത്താവളത്തിന് ആവശ്യമാണോ എന്ന് ശാസ്ത്രീയമായി തെളിയിക്കാൻ സർക്കാരിന് സാധിച്ചില്ലെന്ന് ചൂണ്ടിക്കാട്ടിയായിരുന്നു ഹൈക്കോടതി വിജ്ഞാപനം തടഞ്ഞത്. സാങ്കേതിക തടസ്സങ്ങൾ നീക്കണമെന്നാണ് ആവശ്യം.
ശബരിമല തീർത്ഥാടകർക്കും മധ്യതിരുവിതാംകൂറിലെ വികസനത്തിനും മുതൽക്കൂട്ടാകുമെന്ന് കരുതുന്ന ഗ്രീൻഫീൽഡ് വിമാനത്താവളത്തിനായി സാമൂഹിക ആഘാത പഠനം ഉൾപ്പെടെയുള്ള നടപടികളുമായി സർക്കാർ മുന്നോട്ട് പോകുന്നതിനിടെയാണ് കോടതി ഇടപെടലുണ്ടായത്. സർക്കാർ നൽകിയ ഈ അപ്പീലിൽ ഡിവിഷൻ ബെഞ്ച് സ്വീകരിക്കുന്ന നിലപാട് പദ്ധതിയുടെ ഭാവി നിശ്ചയിക്കും.
