തിരുവനന്തപുരം: യുവജന നേതാവ് രാഹുൽ മാങ്കൂട്ടത്തിലിനെതിരായ ലൈംഗികാരോപണ കേസിലെ അതിജീവിത, താൻ നേരിടുന്ന ക്രൂരമായ സൈബർ-വ്യക്തിപരമായ വേട്ടയാടലുകൾ ചൂണ്ടിക്കാട്ടി മുഖ്യമന്ത്രിക്കും ആഭ്യന്തരമന്ത്രിക്കും കത്തയച്ചു (Rahul Mamkootathil case update). അതീവ വൈകാരികമായ പരാമർശങ്ങളാണ് കത്തിലുള്ളത്. ഒരു വ്യക്തി മരണപ്പെട്ടാൽ ആ മൃതദേഹത്തിന് പോലുമുള്ള ആദരവിനും അന്തസ്സിനും നിയമപരമായി അവകാശമുണ്ടെന്നും, എന്നാൽ ജീവിച്ചിരിക്കുന്ന താൻ പൊതുസമൂഹത്തിൽ നിരന്തരം അപമാനിക്കപ്പെടുകയാണെന്നും അതിജീവിത കത്തിൽ വേദനയോടെ ചൂണ്ടിക്കാട്ടുന്നു.
മാധ്യമങ്ങളിലൂടെയും സമൂഹമാധ്യമങ്ങളിലൂടെയും ദീപ ജോസഫ് എന്ന വ്യക്തി നടത്തുന്ന അപകീർത്തികരമായ പരാമർശങ്ങൾ തന്നെ മാനസികമായി തകർക്കുന്നുവെന്നും അതിജീവിത കത്തിൽ വ്യക്തമാക്കുന്നുണ്ട്.
ലൈംഗികാതിക്രമം ഉണ്ടാക്കിയ കടുത്ത ട്രോമയിൽ (Trauma) നിന്നും മാനസിക പ്രയാസങ്ങളിൽ നിന്നും പുറത്തുകടക്കാൻ ശ്രമിക്കുന്ന തന്നെയല്ല, മറിച്ച് ആരോപണവിധേയരെ സംരക്ഷിക്കാൻ ദീപ ജോസഫ് നിരന്തരം വേട്ടയാടുകയാണെന്ന് കത്തിൽ പറയുന്നു.
ഈ വിഷയത്തിൽ തിരുവനന്തപുരം സിറ്റി പോലീസ് ദീപ ജോസഫിനെതിരെ ജാമ്യമില്ലാ വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ടെങ്കിലും ഇതുവരെ അവരെ അറസ്റ്റ് ചെയ്യാൻ പോലീസിന് സാധിച്ചിട്ടില്ല. കീഴ്കോടതികളിൽ നിന്ന് ഇവർ ജാമ്യമോ മുൻകൂർ ജാമ്യമോ കൈപ്പറ്റിയിട്ടുമില്ല. നിയമവ്യവസ്ഥയെ വെല്ലുവിളിച്ച് ഇവർ ഒളിവിൽ കഴിയുകയാണെന്നും, അടുത്തിടെ ഡൽഹിയിൽ വെച്ച് മാധ്യമങ്ങളോട് ഇവർ നടത്തിയ വിവാദ പരാമർശങ്ങൾ കൂടി നിലവിലെ പോലീസ് അന്വേഷണ പരിധിയിൽ ഉൾപ്പെടുത്തണമെന്നും അതിജീവിത കത്തിലൂടെ സർക്കാരിനോട് ആവശ്യപ്പെട്ടു.
Story Summary: The survivor in the sexual harassment case against Rahul Mamkootathil has written an emotional letter to the Chief Minister and Home Minister. She raised serious concerns about being continuously harassed and defamed online by Deepa Joseph, despite a police case being registered in Thiruvananthapuram.
