അമ്പലപ്പുഴ: രോഗിയായ ബന്ധുവിനെ ആശുപത്രിയിലെത്തിക്കാനുള്ള ശ്രമത്തിനിടയിൽ വാഹനാപകടത്തിൽപ്പെട്ട് യുവതി മരിച്ചു (Punnapra Accident). പുന്നപ്ര സ്വദേശിനി സ്വാതി (22) ആണ് ദാരുണമായി കൊല്ലപ്പെട്ടത്. പുലർച്ചെ ഒന്നരയോടെ പുനപ്ര അറവുകാട് കണ്ണമ്പള്ളി ജംഗ്ഷന് സമീപമായിരുന്നു അപകടം.
സ്വാതിയുടെ മാതൃസഹോദരൻ അഭിലാഷിന് പെട്ടെന്നുണ്ടായ കഠിനമായ വയറുവേദനയെത്തുടർന്ന് മെഡിക്കൽ കോളേജ് ആശുപത്രിയിലേക്ക് ഓട്ടോയിൽ പോകുകയായിരുന്നു സ്വാതിയും സംഘവും. യാത്രാമധ്യേ ഇടറോഡിൽ നിന്നും പഴയ നടക്കാവ് റോഡിലേക്ക് പെട്ടെന്ന് കയറിവന്ന ബൈക്ക് യാത്രക്കാരനെ രക്ഷിക്കാനായി ഓട്ടോ വെട്ടിച്ചുമാറ്റി. ഇതിനിടെ നിയന്ത്രണം തെറ്റിയ ഓട്ടോറിക്ഷ സമീപത്തെ വൈദ്യുതി പോസ്റ്റിലിടിച്ച് മറിയുകയായിരുന്നു.
ഇടിയുടെ ആഘാതത്തിൽ ഒടിഞ്ഞ പോസ്റ്റ് വൈദ്യുത കമ്പികളോടെ ഓട്ടോയ്ക്ക് മുകളിലേക്ക് വീണത് രക്ഷാപ്രവർത്തനം ദുഷ്കരമാക്കി. തുടർന്ന് കെ.എസ്.ഇ.ബി ജീവനക്കാരെത്തി വൈദ്യുതി വിച്ഛേദിച്ച ശേഷമാണ് ഒരു മണിക്കൂറോളം നീണ്ട പരിശ്രമത്തിനൊടുവിൽ സ്വാതിയെ പുറത്തെടുത്തത്. എന്നാൽ അപ്പോഴേക്കും രക്തം വാർന്ന് സ്വാതി മരിച്ചിരുന്നു.
പുന്നപ്ര പാലപ്പറമ്പ് വീട്ടിൽ സോണിമോന്റെയും മിനി മോളുടെയും മകളാണ് മരിച്ച സ്വാതി. ഒപ്പമുണ്ടായിരുന്ന ബന്ധുക്കളായ അഭിലാഷ്, ദീപിക, ഓട്ടോ ഡ്രൈവർ ഹരിസുധൻ എന്നിവർ പരിക്കുകളോടെ രക്ഷപ്പെട്ടു. ഇവരെ ആശുപത്രിയിൽ പ്രവേശിപ്പിച്ചു.
Story Summary: A 22-year-old woman, Swathy, died in a tragic accident in Punnapra while rushing a relative to the hospital. The auto-rickshaw she was traveling in hit an electric post while trying to avoid a biker, causing the post to fall on the vehicle and delaying rescue efforts.
