തിരുവനന്തപുരം: നിലവിലെ പ്രതിപക്ഷ നേതാവ് പിണറായി വിജയൻ മുഖ്യമന്ത്രിയായിരിക്കെ കഴിഞ്ഞ പത്തുവർഷമായി തുടർച്ചയായി ഉപയോഗിച്ചുവന്ന ഔദ്യോഗിക മൊബൈൽ നമ്പർ പൊതുഭരണ വകുപ്പ് (GAD) റദ്ദാക്കി (Pinarayi Vijayan official mobile number). യാതൊരുവിധ മുൻകൂർ അറിയിപ്പും നൽകാതെയാണ് അതീവ പ്രാധാന്യമുള്ള ഈ കണക്ഷൻ പെട്ടെന്ന് കട്ട് ചെയ്തതെന്ന ആക്ഷേപം ശക്തമായിട്ടുണ്ട്.
മുൻപ് അദ്ദേഹം സംസ്ഥാന മുഖ്യമന്ത്രിയായിരുന്ന കാലയളവിൽ ഭരണപരമായ ഔദ്യോഗിക ആവശ്യങ്ങൾക്കായി പൊതുഭരണ വകുപ്പ് പ്രത്യേകമായി അനുവദിച്ച നമ്പറായിരുന്നു ഇത്. സംസ്ഥാനത്ത് മന്ത്രിമാർക്കും മറ്റ് ഉന്നത ഭരണഘടനാ പദവിയിലുള്ളവർക്കുമായി ഔദ്യോഗിക ആവശ്യങ്ങൾ നിർവ്വഹിക്കാൻ പ്രത്യേക വി.ഐ.പി (VIP) നമ്പറുകൾ അനുവദിക്കാറുണ്ട്. ഈ മുൻഗണനാ ക്രമത്തിൽ ലഭിച്ച നമ്പറാണ് ഇപ്പോൾ പൊതുഭരണ വകുപ്പ് പെട്ടെന്ന് ഒഴിവാക്കിയിരിക്കുന്നത്.
ഇന്ന് രാവിലെ സാധാരണ പോലെ ഔദ്യോഗിക ആവശ്യങ്ങൾക്കായി ഫോൺ ഉപയോഗിക്കാൻ ശ്രമിക്കുന്നതിനിടെയാണ് സിം കാർഡ് പൂർണ്ണമായും പ്രവർത്തനരഹിതമായ (Deactivated) വിവരം പ്രതിപക്ഷ നേതാവിന്റെ ഓഫീസും അദ്ദേഹവും അറിയുന്നത്. പത്തുവർഷത്തോളമായി പൊതുപ്രവർത്തകരും വിവിധ വകുപ്പ് മേധാവികളും അദ്ദേഹവുമായി ബന്ധപ്പെടാൻ ഉപയോഗിച്ചിരുന്ന പ്രധാന നമ്പർ റദ്ദാക്കിയത് വലിയ ആശയക്കുഴപ്പത്തിന് കാരണമായിട്ടുണ്ട്. എന്നാൽ പ്രതിപക്ഷ നേതാവെന്ന പുതിയ പദവിക്ക് അനുയോജ്യമായ രീതിയിൽ ഔദ്യോഗിക ആവശ്യങ്ങൾക്കായി മറ്റൊരു പുതിയ വി.ഐ.പി നമ്പർ പൊതുഭരണ വകുപ്പ് അദ്ദേഹത്തിന് ഉടൻ തന്നെ അനുവദിക്കുമെന്നാണ് നിലവിൽ ലഭിക്കുന്ന ഔദ്യോഗിക വിവരം.
Story Summary: The General Administration Department has deactivated the official mobile number used by Leader of the Opposition Pinarayi Vijayan for the last 10 years. The number was originally allotted during his tenure as Chief Minister, and a new official number is expected to be issued soon.
