തിരുവനന്തപുരം: വീര്യം കുറഞ്ഞ മദ്യം വിപണിയിലെത്തിക്കുന്നതിനായി മുൻ എൽഡിഎഫ് സർക്കാർ മുൻകൈയെടുത്തിരുന്നതിന്റെ തെളിവുകൾ പുറത്ത്. എക്സൈസ് മന്ത്രിയായിരുന്ന കാലത്ത് എം.വി. ഗോവിന്ദൻ നിയമസഭാ സബ്ജക്ട് കമ്മിറ്റിക്ക് സമർപ്പിച്ച കുറിപ്പാണ് ഇപ്പോൾ ചർച്ചയായിരിക്കുന്നത് (MV Govindan Excise File). മദ്യവർജ്ജനം ലക്ഷ്യമിട്ടുള്ള ബോധവൽക്കരണ പരിപാടികൾക്കിടയിലും, വീര്യം കുറഞ്ഞ മദ്യത്തിന്റെ വിപണനം പ്രോത്സാഹിപ്പിക്കാൻ സർക്കാർ തലത്തിൽ ആസൂത്രിതമായ ഫയൽ നീക്കങ്ങൾ നടന്നിരുന്നു എന്ന് വ്യക്തമാക്കുന്നതാണ് ഈ രേഖകൾ.
വീര്യം കൂടിയ മദ്യത്തിന്റെ ഉപയോഗം കുറയ്ക്കുക എന്ന ലക്ഷ്യത്തോടെ 20% വരെ വീര്യമുള്ള മദ്യം വിപണിയിൽ ലഭ്യമാക്കണമെന്നായിരുന്നു അന്നത്തെ സർക്കാരിന്റെ നിലപാട്. സംസ്ഥാനത്ത് നിലവിൽ വിൽക്കുന്ന ഇന്ത്യൻ നിർമ്മിത വിദേശമദ്യത്തിന് 42.86% വീര്യമാണുള്ളത്. ഇത് കുറച്ച് 20% വരെ വീര്യമുള്ള മദ്യം കൊണ്ടുവരുന്നതിലൂടെ മദ്യപാനികളുടെ ശീലത്തിൽ മാറ്റം വരുത്താൻ സാധിക്കുമെന്ന് സർക്കാർ വിശ്വസിക്കുന്നുവെന്ന് എം.വി. ഗോവിന്ദൻ തന്റെ കുറിപ്പിൽ വിശദീകരിക്കുന്നു. മദ്യനിരോധനം പ്രായോഗികമല്ലെന്നും, മദ്യവർജ്ജനം എന്ന ആശയമാണ് സർക്കാർ പിന്തുടരുന്നതെന്നും അദ്ദേഹം ഇതിൽ വ്യക്തമാക്കുന്നു.
ഇതുകൂടാതെ, 2021-ൽ ‘ബക്കാർഡി’ കമ്പനി അന്നത്തെ എക്സൈസ് മന്ത്രിയായിരുന്ന എം.വി. ഗോവിന്ദന് അയച്ച കത്തും അടുത്തിടെ പുറത്തുവന്നിരുന്നു. വീര്യം കുറഞ്ഞ മദ്യത്തെ പുതിയൊരു കാറ്റഗറിയായി പരിഗണിക്കണമെന്നും, ഇത് സംസ്ഥാനത്തിന് അധിക വരുമാനം നൽകുമെന്നും കമ്പനി കത്തിൽ ചൂണ്ടിക്കാട്ടിയിരുന്നു. ഈ അപേക്ഷ ലഭിച്ചയുടൻ അടിയന്തരമായി റിപ്പോർട്ട് സമർപ്പിക്കാൻ അദ്ദേഹം നിർദ്ദേശം നൽകിയതായും രേഖകൾ വ്യക്തമാക്കുന്നു.
Summary: Evidence of the previous LDF government’s efforts to promote low-alcohol beverages in Kerala has surfaced, with documents including a note submitted by former Excise Minister M.V. Govindan to the legislative subject committee. The note highlights the government’s plan to introduce liquor with up to 20% alcohol content as a way to reduce the consumption of high-strength liquor (currently at 42.86%). Additionally, a 2021 letter from the liquor company ‘Bacardi’ to M.V. Govindan has come to light, suggesting the creation of a separate category for low-alcohol drinks.
