ഇടുക്കി: വഴിയിൽ ബോധരഹിതനായി വീണുകിടന്ന ആൾ ചികിത്സ കിട്ടാതെ മരിച്ചതായി പരാതി. ഇടുക്കി തൊടുപുഴ ചുങ്കം സ്വദേശി ജയകുമാർ ആണ് കോട്ടയം മെഡിക്കൽ കോളജിൽ ചികിത്സയിലിരിക്കെ മരിച്ചത്. തൊടുപുഴ ജില്ലാ ആശുപത്രി ചികിത്സ നൽകുന്നതിൽ വീഴ്ച വരുത്തിയെന്നാണ് കുടുംബത്തിന്റെ ആരോപണം.(Man found unconscious in Thodupuzha dies, family against the hospital)
ഫെബ്രുവരി 14-നാണ് ജയകുമാറിനെ ചുങ്കത്തിന് സമീപം ബോധരഹിതനായി കണ്ടെത്തിയത്. മദ്യപിച്ചു കിടക്കുകയാണെന്ന് കരുതി മണിക്കൂറുകളോളം പോലീസും ഇയാളെ ശ്രദ്ധിച്ചില്ലെന്ന് ആക്ഷേപമുണ്ട്. പിന്നീട് ഫയർഫോഴ്സ് ആംബുലൻസിൽ തൊടുപുഴ ജില്ലാ ആശുപത്രിയിൽ എത്തിച്ചെങ്കിലും അവിടെയും ചികിത്സ ലഭിച്ചില്ല. പിറ്റേന്ന് രാവിലെ ബന്ധുക്കൾ എത്തുമ്പോൾ ജയകുമാറിനെ യാതൊരു ചികിത്സയും നൽകാതെ ബെഡിൽ കിടത്തിയിരിക്കുകയായിരുന്നു.
അവസ്ഥ ഗുരുതരമായതിനെ തുടർന്ന് കോട്ടയം മെഡിക്കൽ കോളജിലേക്ക് മാറ്റി. എന്നാൽ, ഇത്തരമൊരു പരാതി ശ്രദ്ധയിൽപ്പെട്ടിട്ടില്ലെന്നാണ് തൊടുപുഴ ജില്ലാ ആശുപത്രി അധികൃതരുടെ വിശദീകരണം. സംഭവത്തിൽ ഔദ്യോഗികമായി പരാതി നൽകാനൊരുങ്ങുകയാണ് കുടുംബം.
