തിരുവനന്തപുരം: പശ്ചിമേഷ്യൻ സംഘർഷത്തെത്തുടർന്ന് രാജ്യത്ത് വാണിജ്യ ആവശ്യങ്ങൾക്കുള്ള എൽപിജി ലഭ്യതയിൽ കടുത്ത ദൗർലഭ്യം നേരിടുന്നു. കൊൽക്കത്ത, ചെന്നൈ, മുംബൈ, ബെംഗളൂരു തുടങ്ങിയ നഗരങ്ങളിൽ നൂറുകണക്കിന് ഹോട്ടലുകൾ ഇതിനകം അടച്ചുപൂട്ടലിലേക്ക് എത്തിയതായാണ് റിപ്പോർട്ടുകൾ. (LPG shortage looms in the country, Hotels on verge of closure )
പ്രതിസന്ധി നീണ്ടുപോയാൽ റെസ്റ്റോറന്റ് മേഖലയ്ക്ക് പ്രതിദിനം 1,200 കോടി രൂപയുടെ വരെ നഷ്ടമുണ്ടാകുമെന്ന് മുന്നറിയിപ്പ് നൽകി. ഗ്യാസ് ലഭ്യത കുറഞ്ഞതോടെ പല ഹോട്ടലുകളും തങ്ങളുടെ ഭക്ഷണക്രമത്തിൽ മാറ്റം വരുത്തിത്തുടങ്ങി. പാചകവാതകം അധികം വേണ്ടിവരുന്ന തന്തൂരി വിഭവങ്ങൾ, ദോശ, ഫ്രൈഡ് റൈസ് എന്നിവ പലയിടത്തും ഒഴിവാക്കി. തലസ്ഥാന നഗരത്തിലെ 1,500 ഓളം ഹോട്ടലുകളിൽ 50 എണ്ണം ഇതിനകം പൂട്ടിയിരിക്കുകയാണ്.
എട്ട് സിലിണ്ടറുകൾ ആവശ്യമുള്ളയിടത്ത് അഞ്ചെണ്ണം പോലും ലഭ്യമാകാത്ത അവസ്ഥയാണെന്നും ഉള്ള സ്റ്റോക്ക് അടുത്ത രണ്ട് ദിവസത്തിനുള്ളിൽ തീരുമെന്നും ഹോട്ടലുടമകൾ ആശങ്കപ്പെടുന്നു. വിറകടുപ്പുകളിലേക്ക് മാറുന്നത് നഗരപ്രദേശങ്ങളിൽ പ്രായോഗികമല്ലാത്തതിനാൽ പലരും പൂർണ്ണമായി അടച്ചുപൂട്ടൽ ഭീഷണിയിലാണ്.
നിലവിലെ ഊർജ്ജ പ്രതിസന്ധി മറികടക്കാൻ കേന്ദ്ര സർക്കാർ എൽപിജി വിതരണത്തിൽ കർശനമായ മുൻഗണനാ ക്രമം ഏർപ്പെടുത്തിയിട്ടുണ്ട്. ഗാർഹിക ഉപഭോക്താക്കൾക്കാണ് സർക്കാർ ഒന്നാം മുൻഗണന നൽകുന്നത്. വീടുകളിലേക്കുള്ള ഗ്യാസ് വിതരണം 100 ശതമാനം ഉറപ്പാക്കാൻ ശ്രമിക്കുമ്പോൾ, ആശുപത്രികൾക്കും വിദ്യാഭ്യാസ സ്ഥാപനങ്ങൾക്കും രണ്ടാം മുൻഗണന നൽകി മുടക്കമില്ലാതെ വിതരണം ചെയ്യും. എന്നാൽ മൂന്നാം മുൻഗണനയിലുള്ള വാണിജ്യ മേഖലയ്ക്ക് 20 മുതൽ 30 ശതമാനം വരെ വിതരണത്തിൽ കുറവ് വരുത്തിയിട്ടുണ്ട്.
കേന്ദ്ര പെട്രോളിയം മന്ത്രാലയം എൽപിജി വിതരണത്തെ അവശ്യവസ്തു നിയമത്തിന്റെ പരിധിയിൽ കൊണ്ടുവരികയും പൂഴ്ത്തിവയ്പ്പ് തടയാൻ കർശന നിർദ്ദേശം നൽകുകയും ചെയ്തു. ആഭ്യന്തര ഉൽപ്പാദനം 10 ശതമാനം വരെ വർദ്ധിപ്പിക്കാൻ എണ്ണക്കമ്പനികൾക്ക് നിർദ്ദേശം നൽകിയിട്ടുണ്ടെന്നും സ്ഥിതി നിയന്ത്രണവിധേയമാക്കാൻ തീവ്രശ്രമം നടക്കുന്നുണ്ടെന്നും കേന്ദ്രമന്ത്രി അറിയിച്ചു.
