തിരുവനന്തപുരം: ശബരിമല യുവതീപ്രവേശന വിഷയത്തിൽ പ്രതികരിച്ച് ഗതാഗതമന്ത്രി കെ.ബി. ഗണേഷ് കുമാർ. ആചാരലംഘനം പാടില്ല എന്നതാണ് സർക്കാരിന്റെ ഇപ്പോഴത്തെ നിലപാടെന്നും ജനവികാരം മാനിച്ചുകൊണ്ട് ജനാധിപത്യ സർക്കാരുകൾ തീരുമാനങ്ങളിൽ മാറ്റം വരുത്തുമെന്നും അദ്ദേഹം പറഞ്ഞു.(KB Ganesh Kumar on the entry of women into Sabarimala)
ജനാധിപത്യത്തിൽ തീരുമാനങ്ങളൊന്നും ‘ഇരുമ്പുലക്ക’ അല്ല. ചില സാഹചര്യങ്ങളിൽ എടുത്ത തീരുമാനങ്ങൾ മാറ്റേണ്ടി വരും. ഇത് ഏകാധിപത്യ ഭരണമല്ല, ജനാധിപത്യ സർക്കാരാണെന്നും അദ്ദേഹം ഓർമ്മിപ്പിച്ചു.
എൻ.എസ്.എസ്, എസ്.എൻ.ഡി.പി, കെ.പി.എം.എസ് തുടങ്ങിയ പ്രമുഖ സമുദായ സംഘടനകളെല്ലാം ആചാരലംഘനം പാടില്ല എന്ന നിലപാടുകാരാണ്. ഈ വികാരം സർക്കാർ മാനിക്കുന്നു. വിഷയം ഇടതുമുന്നണി വിശദമായി ചർച്ച ചെയ്യുമെന്നും ആചാരങ്ങൾ സംരക്ഷിക്കപ്പെടണമെന്നതാണ് സർക്കാരിന്റെ നിലപാടെന്നും അദ്ദേഹം വ്യക്തമാക്കി.
