തിരുവനന്തപുരം: നെടുമങ്ങാട് ജില്ലാ ആശുപത്രിയിൽ ഡോക്ടർമാർ നടത്തുന്ന പ്രതിഷേധത്തിനെതിരെ മനുഷ്യാവകാശ കമ്മീഷന് പരാതി നൽകി. കഴിഞ്ഞ ദിവസങ്ങളിലായി ആശുപത്രിയിൽ എത്തുന്ന രോഗികൾക്ക് ചികിത്സ നിഷേധിക്കപ്പെടുന്നുവെന്ന് ചൂണ്ടിക്കാട്ടി യൂത്ത് കോൺഗ്രസ് നേതാവാണ് പരാതി സമർപ്പിച്ചത്.(Doctors’ strike at Nedumangad District Hospital, Complaint filed with Human Rights Commission)
പ്രസവ ശസ്ത്രക്രിയയ്ക്കിടെ നവജാത ശിശു മരിച്ച സംഭവത്തിൽ ഗൈനക്കോളജിസ്റ്റ് ഡോ. ബിന്ദു സുന്ദറിനെ ആരോഗ്യവകുപ്പ് സസ്പെൻഡ് ചെയ്തിരുന്നു. ചികിത്സയിൽ ഗുരുതര വീഴ്ചയുണ്ടായെന്ന വിദഗ്ധ സമിതി റിപ്പോർട്ടിന്റെ അടിസ്ഥാനത്തിലായിരുന്നു നടപടി. ഈ സസ്പെൻഷൻ ഏകപക്ഷീയമാണെന്നും മതിയായ തെളിവുകളില്ലാതെയാണ് ഡോക്ടറെ ശിക്ഷിച്ചതെന്നും ആരോപിച്ച് ഡോക്ടർമാരുടെ സംഘടനയായ കെ.ജി.എം.ഒ.എ പ്രതിഷേധം ആരംഭിച്ചു.
സമരം നീണ്ടുപോയതോടെ സാധാരണക്കാരായ രോഗികൾ വലിയ ദുരിതത്തിലാണ്. ഒ.പി വിഭാഗം ഉൾപ്പെടെയുള്ള സേവനങ്ങൾ തടസ്സപ്പെടുന്നത് ചികിത്സ തേടിയെത്തുന്നവരെ വലയ്ക്കുന്നു. ആരോഗ്യവകുപ്പ് നടപടി പിൻവലിക്കണമെന്നാണ് ഡോക്ടർമാരുടെ ആവശ്യം.
