തിരുവനന്തപുരം: കൊച്ചുവേളി റെയിൽവേ സ്റ്റേഷനിൽ ട്രെയിൻ മാർഗ്ഗം കടത്താൻ ശ്രമിച്ച വൻ കഞ്ചാവ് ശേഖരം പിടികൂടി. കോർബ-കൊച്ചുവേളി എക്സ്പ്രസിൽ (22647) നിന്നാണ് ഏകദേശം 27 കിലോ കഞ്ചാവ് കണ്ടെടുത്തത് (Ganja Seized Kochuveli Express). ബുധനാഴ്ച വൈകുന്നേരത്തോടെ ട്രെയിൻ കൊച്ചുവേളിയിൽ യാത്ര അവസാനിപ്പിച്ചതിന് പിന്നാലെയായിരുന്നു സംഭവം.
യാത്രക്കാർ ഇറങ്ങിയ ശേഷം ട്രെയിനിൽ ശുചീകരണ ജോലികൾക്കായി എത്തിയ ജീവനക്കാരാണ് ഉപേക്ഷിക്കപ്പെട്ട നിലയിൽ രണ്ട് ചാക്കുകൾ കണ്ടത്. സംശയം തോന്നിയ ജീവനക്കാർ ഉടൻ തന്നെ റെയിൽവേ സംരക്ഷണ സേനയെ വിവരം അറിയിക്കുകയായിരുന്നു. ആർപിഎഫ് ഉദ്യോഗസ്ഥർ നടത്തിയ പരിശോധനയിൽ ചാക്കുകൾക്കുള്ളിൽ പ്രത്യേക പാക്കറ്റുകളിലാക്കി സൂക്ഷിച്ച നിലയിലായിരുന്നു കഞ്ചാവ് കണ്ടെത്തിയത്.
സംഭവത്തിൽ ആരെയും ഇതുവരെ പിടികൂടാനായിട്ടില്ല. ട്രെയിൻ സ്റ്റേഷനിൽ എത്തുന്നതിന് മുൻപ് തന്നെ പ്രതികൾ ചാക്കുകൾ ഉപേക്ഷിച്ച് കടന്നുകളഞ്ഞതായാണ് നിഗമനം. പ്രതികളെ തിരിച്ചറിയുന്നതിനായി റെയിൽവേ സ്റ്റേഷനുകളിലെയും പരിസരത്തെയും സിസിടിവി ദൃശ്യങ്ങൾ ആർപിഎഫും റെയിൽവേ പോലീസും പരിശോധിച്ചു വരികയാണ്. ലഹരിക്കടത്ത് സംഘങ്ങളെ കേന്ദ്രീകരിച്ച് അന്വേഷണം ഊർജ്ജിതമാക്കിയതായി അധികൃതർ അറിയിച്ചു.
Summary: In a major drug haul, 27 kg of ganja was seized from the Korba-Kochuveli Express at Kochuveli Railway Station on Wednesday. The contraband was found in two abandoned sacks by cleaning staff after the train completed its journey. RPF officials inspected the bags and found the ganja packed in small packets. No arrests have been made yet, and an investigation is underway to track down the suspects using CCTV footage.
