കൊല്ലം: വോട്ടെടുപ്പിനിടെ ബൂത്തിൽ വോട്ടിങ് മെഷീൻ തകരാറിലായതിനെത്തുടർന്ന് എൻ.കെ. പ്രേമചന്ദ്രന് വോട്ട് രേഖപ്പെടുത്താൻ കാത്തുനിൽക്കേണ്ടി വന്നു. ഇരവിപുരം മണ്ഡലത്തിലെ 50-ാം നമ്പർ ബൂത്തിൽ കുടുംബത്തോടൊപ്പം വോട്ട് ചെയ്യാനെത്തിയപ്പോഴായിരുന്നു സംഭവം. (The machine broke down while he was about to vote, NK Premachandran waited and casted his vote)
വോട്ടിംഗ് മെഷീൻ പണിമുടക്കുകയായിരുന്നു. തുടർന്ന് ഉദ്യോഗസ്ഥർ തകരാർ പരിഹരിച്ച ശേഷമാണ് അദ്ദേഹം സമ്മതിദാനാവകാശം വിനിയോഗിച്ചത്. മുഖ്യമന്ത്രിക്കും നിലവിലെ സർക്കാരിനും എതിരെ ജനങ്ങൾ ശക്തമായി വിധി എഴുതുന്ന തിരഞ്ഞെടുപ്പാണിതെന്ന് വോട്ട് രേഖപ്പെടുത്തിയ ശേഷം അദ്ദേഹം മാധ്യമങ്ങളോട് പറഞ്ഞു.
ഭരണവിരുദ്ധ വികാരം വോട്ടെടുപ്പിൽ പ്രകടമാണെന്നും അദ്ദേഹം കൂട്ടിച്ചേർത്തു. മൂല്യബോധമുള്ള കമ്മ്യൂണിസ്റ്റുകാർ പോലും ഇത്തവണ ഭരണത്തുടർച്ച ആഗ്രഹിക്കുന്നില്ലെന്ന് പ്രേമചന്ദ്രൻ അവകാശപ്പെട്ടു. അത്തരം കമ്മ്യൂണിസ്റ്റുകാരുടെ വോട്ടുകൾ കൂടി ഇത്തവണ യുഡിഎഫിന് ലഭിക്കുമെന്നും സംസ്ഥാനത്ത് വലിയ രാഷ്ട്രീയ മാറ്റമുണ്ടാകുമെന്നും അദ്ദേഹം ശുഭപ്രതീക്ഷ പ്രകടിപ്പിച്ചു.
