തിരുവനന്തപുരം: കേരള നിയമസഭാ തിരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കാനുള്ള സമയം ഇന്ന് വൈകുന്നേരം 3 മണിയോടെ അവസാനിച്ചു (Kerala Assembly Election 2026). പ്രാഥമിക കണക്കുകൾ പ്രകാരം സംസ്ഥാനത്തൊട്ടാകെ 1269 പത്രികകളാണ് ലഭിച്ചിരിക്കുന്നത്. സ്ഥാനാർത്ഥികളുടെ പേരിനോട് സാമ്യമുള്ള സ്വതന്ത്ര സ്ഥാനാർത്ഥികൾ (അപരന്മാർ) ഇത്തവണയും മത്സരരംഗത്ത് സജീവമാണ്.
പ്രധാന മണ്ഡലങ്ങളിലെ അപര ശല്യം
മിക്ക പ്രമുഖ സ്ഥാനാർത്ഥികൾക്കും ഇത്തവണ അപരന്മാരുടെ വെല്ലുവിളിയുണ്ട്. ബേപ്പൂരിൽ യു.ഡി.എഫ് സ്ഥാനാർത്ഥി പി.വി. അൻവറിന് നാല് അപരന്മാരുണ്ട്. അൻവർ, അൻവർ മൊയ്തീൻ, അൻവർ അലി, അൻവർ എൻ.എം എന്നിവരാണ് പത്രിക നൽകിയത്. എൽ.ഡി.എഫ് സ്ഥാനാർത്ഥി പി.എ. മുഹമ്മദ് റിയാസിന് രണ്ട് അപരന്മാരാണുള്ളത് (മുഹമ്മദ് റിയാസ് ടി.സി, മുഹമ്മദ് റിയാസ് ടി.ടി).
ധർമ്മടം മണ്ഡലത്തിൽ മുഖ്യമന്ത്രി പിണറായി വിജയനും മണ്ഡലത്തിൽ അപരനുണ്ട്.
പേരാവൂരിൽ എൽ.ഡി.എഫ് സ്ഥാനാർത്ഥി കെ.കെ. ശൈലജയ്ക്കും യു.ഡി.എഫ് സ്ഥാനാർത്ഥി സണ്ണി ജോസഫിനും അപരന്മാരുണ്ട്. ശൈലജ എ.വി എന്ന പേരിൽ ഒരാൾ ശൈലജ ടീച്ചർക്കെതിരെ പത്രിക നൽകി. സണ്ണി ജോസഫിന് രണ്ട് അപരന്മാരാണുള്ളത്.
മഞ്ചേശ്വരത്ത് യു.ഡി.എഫ് സ്ഥാനാർത്ഥി എ.കെ.എം. അഷ്റഫിന് രണ്ട് അപരന്മാരുണ്ട് (മുഹമ്മദ് അഷ്റഫ്, മുഹമ്മദ് അഷ്റഫ് കെ.എ).
പൊന്നാനി: എൽ.ഡി.എഫ് സ്ഥാനാർത്ഥി എം.കെ. സക്കീറിന് മൂന്ന് അപരന്മാരുണ്ട്. സക്കീർ എന്ന പേരിൽ രണ്ടും, സഗീർ എന്ന പേരിൽ ഒരാളുമാണ് പത്രിക നൽകിയത്.
താനൂരിൽ യു.ഡി.എഫ് സ്ഥാനാർത്ഥി പി.കെ. നവാസിനെതിരെ നവാസ് എന്ന പേരിൽ മറ്റൊരു സ്വതന്ത്രനും രംഗത്തുണ്ട്.
സൂക്ഷ്മ പരിശോധനയ്ക്ക് ശേഷം പത്രിക പിൻവലിക്കാനുള്ള സമയം കഴിയുന്നതോടെ അന്തിമ സ്ഥാനാർത്ഥി പട്ടിക വ്യക്തമാകും. വോട്ടർമാർക്കിടയിൽ ആശയക്കുഴപ്പമുണ്ടാക്കാൻ ലക്ഷ്യമിട്ടുള്ള അപരന്മാരുടെ സാന്നിധ്യം മുന്നണികളെ ആശങ്കപ്പെടുത്തുന്നുണ്ട്.
Story Summary:
Nomination filing for the 2026 Kerala Assembly elections concluded today with 1,269 sets of papers received. A significant challenge for major candidates is the presence of ‘dummy’ or namesake candidates (aparanmar). Notable instances include P.V. Anwar (UDF, Beypore) with 4 namesakes, P.A. Mohammed Riyas (LDF, Beypore) with 2, and Chief Minister Pinarayi Vijayan (Dharmadam) with 1. Other key leaders like K.K. Shailaja, Sunny Joseph, and A.K.M. Ashraf also face namesakes in their respective constituencies, potentially complicating the voting process.
