എറണാകുളം: നിയമസഭാ തിരഞ്ഞെടുപ്പിൽ വടക്കൻ പറവൂർ മണ്ഡലം തിരിച്ചുപിടിക്കാൻ ലക്ഷ്യമിട്ടുള്ള സ്ഥാനാർത്ഥി സാധ്യത പട്ടിക സി.പി.ഐ ജില്ലാ നേതൃത്വം സംസ്ഥാന നേതൃത്വത്തിന് കൈമാറി. നാളെ ചേരുന്ന സംസ്ഥാന എക്സിക്യൂട്ടീവ് യോഗം വടക്കൻ പറവൂരിലെ കാര്യത്തിൽ അന്തിമ തീരുമാനമെടുക്കും.(CPI in North Paravur against VD Satheesan, List of possible candidates handed over to state leadership)
സി.പി.ഐ സാധ്യത പട്ടികയിലെ പ്രമുഖർ കെ.എം. ദിനകരൻ, കമലാ സദാനന്ദൻ, കെ.ബി. അറുമുഖൻ എന്നിവരാണ്. ഇതിനുപുറമെ എ.ഐ.വൈ.എഫ് നേതാവ് ബിബിൻ ദിനകരനെ പരിഗണിക്കണമെന്ന ആവശ്യവും പാർട്ടിയിലുണ്ട്.
2001 മുതൽ വി.ഡി. സതീശൻ തുടർച്ചയായി വിജയിക്കുന്ന മണ്ഡലത്തിൽ ഇത്തവണ മത്സരം കടുപ്പിക്കാൻ സി.പി.എം സീറ്റ് ഏറ്റെടുക്കണമെന്ന ചർച്ചകൾ ഉയർന്നിരുന്നു. ഓരോ തിരഞ്ഞെടുപ്പിലും സതീശൻ ഭൂരിപക്ഷം ഉയർത്തുന്നത് ചൂണ്ടിക്കാട്ടിയായിരുന്നു ഈ ആവശ്യം. എന്നാൽ, ഒടുവിൽ നടന്ന ചർച്ചകളിൽ സീറ്റ് സി.പി.ഐ തന്നെ നിലനിർത്താൻ തീരുമാനിക്കുകയായിരുന്നു.
