കൊല്ലം: ജി.എസ്. ജയലാലിലൂടെ മണ്ഡലം നിലനിർത്താൻ എൽഡിഎഫ് ശ്രമിക്കുമ്പോൾ, കേരളത്തിൽ ബിജെപി ഏറ്റവും കൂടുതൽ വിജയപ്രതീക്ഷ പുലർത്തുന്ന മണ്ഡലങ്ങളിലൊന്നായി ചാത്തന്നൂർ മാറിയിരിക്കുന്നു. യുഡിഎഫിനെ മൂന്നാം സ്ഥാനത്തേക്ക് തള്ളിക്കൊണ്ട് ബിജെപി നടത്തിയ മുന്നേറ്റമാണ് ഇവിടുത്തെ പ്രധാന ചർച്ചാവിഷയം.(BJP to create a rift in the Left stronghold in Chathannur)
2016-ൽ 34,407 വോട്ടുകളുടെ കൂറ്റൻ ഭൂരിപക്ഷത്തിന് വിജയിച്ച ജി.എസ്. ജയലാലിന് 2021-ൽ അത് നിലനിർത്താനായില്ല. ഭൂരിപക്ഷം 17,206 ആയി പകുതിയോളം കുറഞ്ഞു. ഇത് എൽഡിഎഫ് ക്യാമ്പിൽ ആശങ്കയുണ്ടാക്കുന്നുണ്ട്. ബി.ബി. ഗോപകുമാറിലൂടെ കഴിഞ്ഞ രണ്ട് വട്ടവും ബിജെപി വോട്ടുവിഹിതത്തിൽ വലിയ വർദ്ധനവാണ് രേഖപ്പെടുത്തിയത്. 2021-ൽ വോട്ടുവിഹിതത്തിൽ ഏകദേശം 6 ശതമാനത്തിന്റെ വർദ്ധനവുണ്ടാക്കാൻ എൻഡിഎയ്ക്ക് സാധിച്ചു.
ഒരുകാലത്ത് ശക്തമായ സാന്നിധ്യമായിരുന്ന യുഡിഎഫ് കഴിഞ്ഞ രണ്ട് തിരഞ്ഞെടുപ്പുകളിലും മൂന്നാം സ്ഥാനത്തേക്ക് പിന്തള്ളപ്പെട്ടു. 2011-ൽ ബിന്ദു കൃഷ്ണ നേടിയ വോട്ടുകളുമായി താരതമ്യം ചെയ്യുമ്പോൾ വലിയ തകർച്ചയാണ് പിന്നീട് യുഡിഎഫിന് മണ്ഡലത്തിൽ സംഭവിച്ചത്. ചാത്തന്നൂർ ഗ്രാമപഞ്ചായത്തും ആദിച്ചനല്ലൂർ, കല്ലുവാതുക്കൽ, പൂതക്കുളം, പരവൂർ നഗരസഭ തുടങ്ങിയ പ്രദേശങ്ങളും ഉൾപ്പെടുന്ന മണ്ഡലത്തിൽ പ്രാദേശിക വികസന പ്രശ്നങ്ങളും രാഷ്ട്രീയ അടിയൊഴുക്കുകളും നിർണ്ണായകമാകും.
