മോസ്കോ: ഇസ്രായേൽ-അമേരിക്കൻ സംയുക്താക്രമണത്തിൽ ഇറാന്റെ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ട സംഭവത്തിൽ റഷ്യൻ പ്രസിഡന്റ് വ്ളാഡിമിർ പുടിൻ അനുശോചനം രേഖപ്പെടുത്തി. ഇറാൻ പ്രസിഡന്റ് മസൂദ് പെസെഷ്കിയനുമായി നടത്തിയ ടെലിഫോൺ സംഭാഷണത്തിലാണ് പുടിൻ ഇറാനുണ്ടായ നാശനഷ്ടങ്ങളിൽ ദുഃഖം പ്രകടിപ്പിച്ചത്. അമേരിക്കയുടെയും ഇസ്രായേലിന്റെയും സൈനിക നീക്കങ്ങൾ അടിയന്തരമായി അവസാനിപ്പിക്കണമെന്ന് അദ്ദേഹം ആവശ്യപ്പെട്ടു.(Putin intervened and expressed condolences over Khamenei’s assassination)
കൊല്ലപ്പെട്ട ആയത്തുള്ള അലി ഖമേനിയുടെ കുടുംബാംഗങ്ങൾക്കും ആക്രമണത്തിൽ മരിച്ച സൈനിക-രാഷ്ട്രീയ നേതാക്കൾക്കും സാധാരണക്കാർക്കും വേണ്ടി പുടിൻ അനുശോചനം അറിയിച്ചു. മേഖലയിലെ സംഘർഷം കൂടുതൽ വഷളാക്കരുതെന്ന് ഇറാനോട് അഭ്യർത്ഥിച്ച പുടിൻ, സൈനിക ശക്തി ഉപയോഗിച്ച് പ്രശ്നങ്ങൾ പരിഹരിക്കുന്നതിനോടുള്ള റഷ്യയുടെ ശക്തമായ എതിർപ്പ് ആവർത്തിച്ചു.
ഗൾഫ് സഹകരണ കൗൺസിൽ രാജ്യങ്ങളിലെ നേതാക്കളുമായി താൻ നിരന്തരം ആശയവിനിമയം നടത്തുന്നുണ്ടെന്നും മേഖലയിൽ സമാധാനം പുനഃസ്ഥാപിക്കാൻ റഷ്യയുടെ പൂർണ്ണ പിന്തുണയുണ്ടാകുമെന്നും അദ്ദേഹം വ്യക്തമാക്കി. യുദ്ധസാഹചര്യം ആഗോള എണ്ണവില വർദ്ധിപ്പിക്കുന്നതിനും സാമ്പത്തിക അനിശ്ചിതത്വത്തിനും കാരണമാകുന്നതിനെക്കുറിച്ച് ഇരുനേതാക്കളും ആശങ്ക പങ്കുവെച്ചു. ഇറാന്റെ പരമാധികാരത്തെ മാനിക്കുന്ന റഷ്യയുടെ നിലപാടിന് പ്രസിഡന്റ് മസൂദ് പെസെഷ്കിയൻ നന്ദി അറിയിച്ചു.
