ന്യൂയോർക്ക്: അപ്രതീക്ഷിത അട്ടിമറികളും അവിസ്മരണീയ ഗോളുകളും കൊണ്ട് ആവേശം വിതറുന്ന 2026 ഫിഫ ലോകകപ്പിൽ മുൻപെങ്ങും കാണാത്ത ഒരു അപൂർവ്വ ഗോൾവേട്ട റെക്കോർഡ് പിറന്നു. ലോകകപ്പ് ചരിത്രത്തിൽ ആദ്യമായി മൂന്ന് വ്യത്യസ്ത കളിക്കാർ ഒരേ ടൂർണമെന്റിൽ ഏഴോ അതിലധികമോ ഗോളുകൾ നേടുന്ന നേട്ടത്തിനാണ് നിലവിൽ മൈതാനം സാക്ഷ്യം വഹിച്ചിരിക്കുന്നത്. നോർവെയുടെ ഏർലിങ് ഹാലൻഡ്, അർജന്റീന നായകൻ ലയണൽ മെസ്സി, ഫ്രാൻസിന്റെ കിലിയൻ എംബാപ്പെ എന്നിവരാണ് ഏഴ് ഗോളുകളുമായി നിലവിൽ ടോപ്പ് സ്കോറർ പട്ടികയിൽ ഒന്നാമതുള്ളത്.(FIFA World Cup 2026 Erling Haaland Lionel Messi Kylian Mbappe Seven Goals Golden Boot Race)
തങ്ങളുടെ രാജ്യങ്ങളെ നോക്കൗട്ട് ഘട്ടങ്ങളിലേക്ക് നയിക്കുന്നതിനൊപ്പം വ്യക്തിഗത നേട്ടത്തിനായുള്ള ഈ മൂന്ന് സൂപ്പർ താരങ്ങളുടെ പോരാട്ടം ടൂർണമെന്റിലെ ഏറ്റവും ആവേശകരമായ കഥയായി മാറിക്കഴിഞ്ഞു. ഞായറാഴ്ച നടന്ന പ്രീ-ക്വാർട്ടർ പോരാട്ടത്തിൽ അഞ്ച് തവണത്തെ ചാമ്പ്യന്മാരായ ബ്രസീലിനെ ഒന്നിനെതിരെ രണ്ട് ഗോളുകൾക്ക് അട്ടിമറിച്ച് നോർവെ ചരിത്രത്തിലാദ്യമായി ലോകകപ്പ് ക്വാർട്ടർ ഫൈനലിൽ കടന്നപ്പോഴാണ് ഹാലൻഡ് ഈ റെക്കോർഡ് ക്ലബ്ബിൽ അംഗമായത്. മത്സരത്തിന്റെ ഭൂരിഭാഗം സമയവും ബ്രസീൽ പ്രതിരോധം ഹാലൻഡിനെ പൂട്ടിയിട്ടെങ്കിലും രണ്ടാം പകുതിയിലെ ഹൈഡ്രേഷൻ ബ്രേക്കിന് ശേഷം താരം കളി തിരിച്ചുപിടിച്ചു.
79-ാം മിനിറ്റിൽ ആൻഡ്രിയാസ് ഷെൽഡ്രൂപ്പിന്റെ കൃത്യതയാർന്ന ക്രോസിൽ നിന്ന് തകർപ്പൻ ഹെഡ്ഡറിലൂടെ ഹാലൻഡ് നോർവെയെ മുന്നിലെത്തിച്ചു. തുടർന്ന് മത്സരത്തിന്റെ അവസാന നിമിഷങ്ങളിൽ തന്റെ രണ്ടാമത്തെ ഗോളും നേടി ഹാലൻഡ് ടീമിന്റെ ചരിത്ര വിജയം ഉറപ്പിച്ചു. രണ്ട് ഗോളുകൾക്കും വഴിയൊരുക്കിയ ഷെൽഡ്രൂപ്പ് ഹാലൻഡിന്റെ പുറത്തേക്ക് ചാടിക്കയറിയാണ് ഈ ചരിത്ര മുഹൂർത്തം ആഘോഷിച്ചത്.
ഗോൾഡൻ ബൂട്ട് റേസ്: ആര് നേടും?
ബ്രസീലിനെതിരായ ഇരട്ട ഗോളുകളോടെ ഹാലൻഡിന്റെ ഗോൾ സമ്പാദ്യം ഏഴായി ഉയർന്നു. ഇതോടെ മെസ്സിക്കും എംബാപ്പെയ്ക്കുമൊപ്പം താരം ഒന്നാമതെത്തി. നിലവിൽ മൂവരും ഏഴ് ഗോളുകളിൽ ഒപ്പത്തിനൊപ്പമാണെങ്കിലും രണ്ട് അസിസ്റ്റുകൾ കൂടിയുള്ള കിലിയൻ എംബാപ്പെയാണ് ടൈബ്രേക്കർ നിയമപ്രകാരം ഗോൾഡൻ ബൂട്ട് പട്ടികയിൽ നേരിയ മുൻതൂക്കത്തോടെ ഒന്നാമതുള്ളത്. ക്വാർട്ടർ ഫൈനൽ മത്സരങ്ങൾ ആരംഭിക്കാനിരിക്കെ ഈ മൂന്ന് തലമുറയിലെ പ്രതിഭകളുടെ പോരാട്ടം ഫുട്ബോൾ ലോകത്തിന് ആവേശം കൂട്ടുമെന്നുറപ്പാണ്.
Story Summary
For the first time in FIFA World Cup history, three different players—Erling Haaland, Lionel Messi, and Kylian Mbappé—have scored 7 goals each in a single edition during the 2026 tournament. Haaland’s late brace guided Norway to a historic quarterfinal spot after upsetting Brazil, intensifying the race for the prestigious Golden Boot.
