ന്യൂയോർക്ക്: ലോകമെമ്പാടുമുള്ള സംഗീത-കായിക പ്രേമികൾ ഒരുപോലെ കാത്തിരുന്ന ആ വിവാഹം ഒടുവിൽ നടന്നു. പോപ്പ് സൂപ്പർ സ്റ്റാർ ടെയ്ലർ സ്വിഫ്റ്റും അമേരിക്കൻ ഫുട്ബോൾ താരം ട്രാവിസ് കെൽസിയും ന്യൂയോർക്കിലെ വിഖ്യാതമായ മാഡിസൺ സ്ക്വയർ ഗാർഡനിൽ വെച്ച് ജൂലൈ 3-ന് വിവാഹിതരായി. കടുത്ത സുരക്ഷാ ക്രമീകരണങ്ങളോടെയും അതീവ രഹസ്യമായും നടത്തിയ ചടങ്ങിൽ അതിഥികൾക്ക് മൊബൈൽ ഫോണുകൾ വിലക്കിയിരുന്നു. കൂടാതെ പുറത്തുനിന്നുള്ള കാഴ്ചകൾ മറയ്ക്കാൻ 180 അടി നീളമുള്ള കൂറ്റൻ ടെന്റും ഒരുക്കിയിരുന്നു. എങ്കിലും ചെലവേറിയതും ആഡംബരപൂർണ്ണവുമായ ഈ വിവാഹത്തിന്റെ അണിയറ വിശേഷങ്ങൾ ഇപ്പോൾ പുറത്തുവന്നിരിക്കുകയാണ്.(Taylor Swift And Travis Kelce Grand Wedding At Madison Square Garden Details Out)
ഏകദേശം 35 മുതൽ 50 മില്യൺ ഡോളർ വരെ ചെലവിട്ടാണ് ഈ സ്വപ്നവിവാഹം ഒരുക്കിയതെന്നാണ് ഇവന്റ് ഡിസൈനർമാരുടെ കണക്കുകൂട്ടൽ. “എല്ലാം മാന്ത്രികമായിരുന്നു” എന്നാണ് കെൽസിയുടെ അമ്മ ഡോണ ഈ സുദിനത്തെ വിശേഷിപ്പിച്ചത്. വിവാഹശേഷം മാഡിസൺ സ്ക്വയർ ഗാർഡന് പുറത്ത് ഇരുവരുടെയും പേരുകളുടെ ആദ്യക്ഷരങ്ങൾ ചേർത്തുവെച്ച് തിളങ്ങിയ ഈ ബോർഡ് ആരാധകരുടെ ശ്രദ്ധ പിടിച്ചുപറ്റി. വിവാഹച്ചടങ്ങുകൾക്ക് നേതൃത്വം നൽകിയത് ഹോളിവുഡ് താരം ആദം സാൻഡ്ലർ ആയിരുന്നു എന്നത് എല്ലാവരെയും അത്ഭുതപ്പെടുത്തി. ട്രാവിസ് കെൽസിയുടെ അടുത്ത സുഹൃത്താണ് അദ്ദേഹം.
വിഖ്യാത സംഗീതജ്ഞരായ സർ പോൾ മക്കാർട്ട്നിയും സ്റ്റീവി നിക്സും വിവാഹശേഷമുള്ള പാർട്ടിയിൽ തത്സമയ പ്രകടനം നടത്തി അതിഥികളെ വിസ്മയിപ്പിച്ചു. ക്രിസ്റ്റ്യൻ ഡിയോർ ഹൗട്ട് കോച്ചർ ഡിസൈൻ ചെയ്ത വസ്ത്രങ്ങളും ക്രിസ്റ്റ്യൻ ലൂബൗട്ടിൻ ഇരുവരുടെയും അളവുകൾക്കനുസരിച്ച് പ്രത്യേകം തയ്ച്ചുനൽകിയ ചെരിപ്പുകളുമാണ് വധൂവരന്മാർ ധരിച്ചിരുന്നത്. വിവാഹത്തിന് എത്തുന്നവർ യാതൊരുവിധ സമ്മാനങ്ങളും കൊണ്ടുവരരുതെന്ന് കർശന നിർദ്ദേശമുണ്ടായിരുന്നു. അതിഥികൾക്ക് തിരികെ നൽകിയ സമ്മാനങ്ങളിൽ സ്വിഫ്റ്റിന്റെ ‘ബ്ലാങ്ക് സ്പേസ്’ എന്ന പാട്ടിലെ വരികൾ തുന്നിച്ചേർത്ത റൂമാലുകൾ ഉൾപ്പെട്ടിരുന്നു. വിവാഹത്തോടനുബന്ധിച്ച് 26 മില്യൺ ഡോളർ കാൻസർ ബാധിതരായ കുട്ടികളുടെ ചികിത്സയ്ക്കും പട്ടിണി നിർമ്മാർജ്ജനത്തിനുമായി ദമ്പതികൾ ദാനം ചെയ്തു.
ചടങ്ങിന് ശേഷം ന്യൂയോർക്കിൽ മഴ പെയ്തപ്പോൾ മാഡിസൺ സ്ക്വയർ ഗാർഡൻ മുഴുവൻ ലാവെൻഡർ വെളിച്ചത്തിൽ കുളിച്ചുനിന്നു. ഉള്ളിൽ അഞ്ച് നിലകളോളം ഉയരമുള്ള കൃത്രിമ മരങ്ങളും പൂക്കളും വെച്ച് ‘സീക്രട്ട് ഗാർഡൻ’ എന്ന തീമിലാണ് വേദി ഒരുക്കിയിരുന്നത്. ഏകദേശം 1000-ത്തോളം പ്രമുഖർ പങ്കെടുത്ത ചടങ്ങിൽ വധുവിന്റെ സഹോദരൻ ഓസ്റ്റിൻ സ്വിഫ്റ്റും വരന്റെ സഹോദരൻ ജേസൺ കെൽസിയും മാത്രമാണ് വിവാഹസംഘത്തിലുണ്ടായിരുന്നത്.
Story Summary in Short
Pop icon Taylor Swift and NFL star Travis Kelce tied the knot in a highly secured, lavish wedding at New York’s Madison Square Garden on July 3. The star-studded event, estimated to cost up to $50 million, featured performances by Paul McCartney and was officiated by actor Adam Sandler.
