ചെന്നൈ: തെന്നിന്ത്യൻ സൂപ്പർ സ്റ്റാർ സൂര്യയെ നായകനാക്കി ആർ.ജെ. ബാലാജി സംവിധാനം ചെയ്ത ഏറ്റവും പുതിയ തമിഴ് ചിത്രം ‘കറുപ്പ്’ ബോക്സ് ഓഫീസിൽ തരംഗം സൃഷ്ടിച്ച് മുന്നേറുന്നു. തിയേറ്ററുകളിൽ റിലീസ് ചെയ്ത് മൂന്നാഴ്ച പിന്നിടുമ്പോൾ ചിത്രം ലോകമെമ്പാടുമുള്ള കളക്ഷൻ റെക്കോർഡുകൾ ഭേദിച്ച് 300 കോടി ക്ലബ്ബിൽ ഇടംപിടിച്ചതായാണ് പുതിയ റിപ്പോർട്ടുകൾ (Suriya Gifts BE6 Batman Karuppu Crew). ഈ ചരിത്ര വിജയത്തിന്റെ സന്തോഷം പങ്കുവെക്കുന്നതിനായി ചിത്രത്തിന്റെ വിജയത്തിന് പിന്നിൽ പ്രവർത്തിച്ച പ്രധാന അണിയറ പ്രവർത്തകർക്ക് ആഡംബര കാറുകൾ സമ്മാനമായി നൽകിയിരിക്കുകയാണ് താരം. ചിത്രത്തിൽ നിർണ്ണായക പങ്കുവഹിച്ച സംഗീത സംവിധായകൻ സായ് അഭ്യങ്കർ, പ്രശസ്ത ഛായാഗ്രാഹകൻ ജി.കെ. വിഷ്ണു, എഡിറ്റർ ആർ. കലൈവാണൻ എന്നിവർക്കാണ് സൂര്യ ഈ സ്നേഹസമ്മാനം നൽകിയത്. ഇന്ത്യൻ വാഹന വിപണിയിലെ പുതുതലമുറ ഇലക്ട്രിക് വാഹനമായ മഹീന്ദ്ര BE6 ബാറ്റ്മാൻ എഡിഷൻ കാറുകളാണ് മൂവർക്കും ലഭിച്ചത്. വിപണിയിൽ ഏകദേശം 30 ലക്ഷം രൂപയോളം വിലമതിക്കുന്നതാണ് ഓരോ വാഹനവും.
തങ്ങൾക്ക് ലഭിച്ച ഈ അപ്രതീക്ഷിത ആഡംബര സമ്മാനത്തിന്റെ ചിത്രങ്ങളും സന്തോഷവും അണിയറ പ്രവർത്തകർ സോഷ്യൽ മീഡിയയിലൂടെ ആരാധകരുമായി പങ്കുവെച്ചു. സായ് അഭ്യങ്കർ പുതിയ കാറിനൊപ്പമുള്ള ചിത്രം ഇൻസ്റ്റാഗ്രാമിൽ പങ്കുവെച്ചപ്പോൾ, ഇതൊരു ദൈവാനുഗ്രഹമാണെന്നും സൂര്യ സാറിന് വലിയൊരു ഹൃദയമുണ്ടെന്നുമാണ് ജി.കെ. വിഷ്ണു എക്സിൽ കുറിച്ചത്. എഡിറ്റർ കലൈവാണനും തന്റെ കുടുംബത്തോടൊപ്പം പുതിയ വാഹനത്തിന് മുന്നിൽ നിൽക്കുന്ന ചിത്രം പങ്കുവെച്ച് സൂര്യയ്ക്ക് നന്ദി അറിയിച്ചു. ‘താങ്ക്യൂ റോളക്സ്’ എന്ന ഹാഷ്ടാഗോടെയാണ് സിനിമാ പ്രേമികൾ ഈ വാർത്ത ഏറ്റെടുത്തിരിക്കുന്നത്. നീതിന്യായ വ്യവസ്ഥയിലെ അഴിമതികൾക്കെതിരെ പോരാടുന്ന കറുപ്പസാമി എന്ന ശക്തനായ അഭിഭാഷകനായാണ് സൂര്യ ചിത്രത്തിൽ വേഷമിട്ടിരിക്കുന്നത്. തൃഷ കൃഷ്ണൻ നായികയായും ആർ.ജെ. ബാലാജി തന്നെ വില്ലനായും എത്തുന്ന ചിത്രത്തിൽ മലയാളത്തിന്റെ പ്രിയനടൻ ഇന്ദ്രൻസും ഒരു മുഖ്യവേഷം കൈകാര്യം ചെയ്യുന്നുണ്ട്. ഡ്രീം വാരിയർ പിക്ചേഴ്സ് നിർമ്മിച്ച ഈ ആക്ഷൻ എന്റർടെയ്നർ ചിത്രത്തിന്റെ എഡിറ്റിംഗ്, സംഗീതം, ഛായാഗ്രഹണം എന്നിവയെ പ്രശംസിച്ച് സൂപ്പർ സ്റ്റാർ രജനികാന്തും നേരത്തെ രംഗത്തെത്തിയിരുന്നു.
Summary: Actor Suriya gifted luxury Mahindra BE6 Batman Edition electric cars to the core crew members of his latest blockbuster movie ‘Karuppu’. Music director Sai Abhyankar, cinematographer G.K. Vishnu, and editor R. Kalaivanan received these tokens of appreciation following the film’s massive 300 crore rupee global box office collection. The movie, directed by RJ Balaji and produced by Dream Warrior Pictures, features Suriya as a crusading lawyer alongside Trisha and Indrans.
