ന്യൂഡൽഹി: വികസിത ഭാരതമെന്ന ലക്ഷ്യം കൈവരിക്കാൻ രാജ്യത്തെ യുവത്വം മാനസികമായും ശാരീരികമായും പൂർണ്ണ ആരോഗ്യമുള്ളവരായിരിക്കണമെന്ന് പ്രധാനമന്ത്രി നരേന്ദ്ര മോദി. ലഹരി വസ്തുക്കൾ താൽക്കാലികമായി സന്തോഷം നൽകുമെങ്കിലും അത് ജീവിതത്തെയും ഭാവി കെട്ടിപ്പടുക്കാനുള്ള അവസരങ്ങളെയും തകർത്തു കളയുമെന്ന് അദ്ദേഹം ഓർമ്മിപ്പിച്ചു. രാജ്യത്തെ ലഹരിമുക്തമാക്കുക എന്ന ലക്ഷ്യത്തോടെ സംഘടിപ്പിക്കുന്ന ‘നശാ മുക്ത് യുവ ഫോർ വികസിത് ഭാരത് സങ്കൽപ്പ് അഭിയാൻ’ പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.(PM Modi Launches Nasha Mukt Yuva Abhiyan Calls For Drug Free India)
ഇന്ത്യയുടെ താൽപ്പര്യങ്ങളെ തകർക്കാനും യുവതലമുറയെ വഴിതെറ്റിക്കാനും എതിരാളികളായ രാജ്യങ്ങൾ നടത്തുന്ന ഭീകരപ്രവർത്തനങ്ങളുടെ ഭാഗമാണ് മയക്കുമരുന്ന് കടത്തെന്ന് പ്രധാനമന്ത്രി ചൂണ്ടിക്കാട്ടി. ലഹരിമുക്ത ഭാരതത്തിലേക്ക് അടുത്ത 100 ഞായറാഴ്ചകൾ നിർണ്ണായക ചുവടുവെപ്പുകളാകും. കല, കായികം, യോഗ, ധ്യാനം, സാംസ്കാരിക പരിപാടികൾ എന്നിവ സമന്വയിപ്പിച്ച് ജനപങ്കാളിത്തത്തോടെ ബോധവൽക്കരണം നടത്തും.
ലഹരി അടിമത്തത്തിൽ നിന്ന് മുക്തരാകുന്നവരെ സമൂഹം അവഹേളിക്കരുത്. അവർ പോരാളികളാണ്; അവർക്ക് മാന്യതയും രണ്ടാമതൊരു അവസരവും നൽകി ഒപ്പം നിർത്തണം. മക്കളുടെ ലഹരി ഉപയോഗം സാമൂഹിക മാനക്കേട് ഭയന്ന് മറച്ചുവെക്കരുത്. അവരുമായി തുറന്നു സംസാരിക്കാനും ആവശ്യമായ മെഡിക്കൽ സഹായം ഉറപ്പാക്കാനും മാതാപിതാക്കൾ മുന്നോട്ടുവരണം. ലഹരി കടത്തുകാർക്കെതിരെ കടുത്ത നടപടികളാണ് സർക്കാർ സ്വീകരിക്കുന്നത്. മുൻകാലങ്ങളെ അപേക്ഷിച്ച് അറസ്റ്റിലായവരുടെ എണ്ണത്തിലും പിടിച്ചെടുത്ത മയക്കുമരുന്നിന്റെ അളവിലും വൻ വർദ്ധനവുണ്ടായിട്ടുണ്ടെന്ന് പ്രധാനമന്ത്രി വ്യക്തമാക്കി. കേന്ദ്ര കായിക വകുപ്പ് മന്ത്രി മൻസുഖ് മാണ്ഡവ്യ ഉൾപ്പെടെയുള്ള പ്രമുഖർ ചടങ്ങിൽ പങ്കെടുത്തു.
Story Summary
Prime Minister Narendra Modi launched the ‘Nasha Mukt Yuva for Viksit Bharat Sankalp Abhiyan’, urging the youth to stay away from drugs and pledge towards building a developed India. The 100-week nationwide campaign will feature various Sunday activities promoting physical fitness and social awareness to eradicate substance abuse.
