ന്യൂഡൽഹി: നീറ്റ് ചോദ്യപ്പേപ്പർ ചോർച്ചയ്ക്കെതിരെ ഡൽഹിയിലെ ജന്തർ മന്തറിൽ പ്രക്ഷോഭം നടത്തുന്ന വിദ്യാർത്ഥികൾക്ക് പിന്തുണയുമായി നാഗാലാന്റ് സ്വദേശി. ഡൽഹിയിലെത്തി നേരിട്ട് സമരത്തിൽ പങ്കെടുക്കാൻ സാധിക്കാത്തതിന്റെ വിഷമത്തിൽ പ്രതിഷേധക്കാർക്കായി 150 ‘ഫാംഹൗസ് ചീസ് ബർസ്റ്റ്’ പിസകളാണ് അദ്ദേഹം ഓൺലൈനായി ഓർഡർ ചെയ്തു നൽകിയത്. നികുതിയും മറ്റ് ചാർജുകളും ഉൾപ്പെടെ 67,734 രൂപയാണ് ഇതിനായി ചിലവായത്.(Nagaland Man Orders Pizzas Worth Sixty Eight Thousand Rupees For NEET Protesters)
“നാഗാലാന്റിൽ വീട്ടിലിരുന്ന് ഭക്ഷണം കഴിക്കുമ്പോൾ, ഭാവിക്ക് വേണ്ടിയും നീതിയുക്തമായ വിദ്യാഭ്യാസ സമ്പ്രദായത്തിന് വേണ്ടിയും ദൂരെയെവിടെയോ ജന്തർ മന്തറിൽ വിശന്നു വലഞ്ഞ് സമരം ചെയ്യുന്ന സഹോദരീ സഹോദരന്മാരെക്കുറിച്ച് ചിന്തിച്ച് സങ്കടം തോന്നി. അവിടെയെത്തി ഒപ്പം നിൽക്കാൻ സാധിക്കാത്തതുകൊണ്ട് എനിക്ക് ചെയ്യാൻ കഴിയുന്ന ഏറ്റവും ചെറിയ കാര്യമാണിത്,” എന്ന് അദ്ദേഹം ഇൻസ്റ്റഗ്രാമിൽ കുറിച്ചു.
ഭക്ഷണം എത്തിച്ച ഡെലിവറി ഏജന്റിനോട്, സമരപ്പന്തലിൽ വിശന്നിരിക്കുന്ന ആർക്ക് വേണമെങ്കിലും ഇത് വീതിച്ചു നൽകാൻ അദ്ദേഹം നിർദ്ദേശിച്ചു. ഇതുകേട്ട് വികാരാധീനനായ ഡെലിവറി ഏജന്റ്, “അവർക്ക് നിങ്ങൾ ദൈവത്തെപ്പോലെയാണ്” എന്ന് മറുപടി നൽകിയതായും അദ്ദേഹം പങ്കുവെച്ചു. ലൈക്കുകൾക്കോ പ്രശസ്തിക്കോ വേണ്ടിയല്ല, മറിച്ച് ദൂരെയെവിടെയോ ഇരുന്നുകൊണ്ട് എല്ലാവർക്കും ഇത്തരത്തിൽ സഹായിക്കാൻ സാധിക്കും എന്ന് ഓർമ്മിപ്പിക്കാനാണ് പോസ്റ്റ് പങ്കുവെച്ചതെന്നും യുവാവ് വ്യക്തമാക്കി. സോഷ്യൽ മീഡിയയിൽ ഇതിനോടകം തന്നെ ഇദ്ദേഹത്തിന്റെ വലിയ മനസ്സിന് പിന്തുണയുമായി നിരവധി പേർ രംഗത്തെത്തിയിട്ടുണ്ട്.
Story Summary
A man from Nagaland expressed solidarity with students protesting against the NEET paper leak at Jantar Mantar by ordering 150 Domino’s Cheese Burst pizzas worth nearly Rs 68,000. Unable to join the demonstrations in person, he instructed the delivery executive to distribute the food among hungry protesters, winning widespread praise on social media.
