ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ വെച്ച് ബംഗളൂരു സ്വദേശിയായ കണ്ടന്റ് ക്രിയേറ്റർ റിയാസ് ചെയ്ത ചെറിയൊരു സഹായം സോഷ്യൽ മീഡിയയിൽ വലിയ ചർച്ചയാകുന്നു (Delhi Airport Viral Video). വിമാനത്തിൽ കയറുന്നതിന് തൊട്ടുമുൻപ് എയർ ബ്രിഡ്ജിൽ വെച്ച് സ്വന്തം ചിത്രം പകർത്താൻ പ്രയാസപ്പെടുന്ന ഒരു യാത്രക്കാരനെ ശ്രദ്ധയിൽപ്പെട്ട റിയാസ്, അദ്ദേഹത്തെ സഹായിക്കാൻ മുൻകൈ എടുക്കുകയായിരുന്നു.
വിമാനത്തിൽ ആദ്യമായി യാത്ര ചെയ്യുന്നതാണെന്ന് തോന്നിക്കുന്ന രീതിയിൽ സെൽഫി എടുക്കാൻ കഷ്ടപ്പെടുന്ന യാത്രക്കാരനെ കണ്ടപ്പോൾ റിയാസ് അദ്ദേഹത്തിന്റെ അടുത്തേക്ക് ചെല്ലുകയും ഫോട്ടോ എടുത്തുനൽകാൻ വാഗ്ദാനം ചെയ്യുകയും ചെയ്തു. പശ്ചാത്തലത്തിൽ വിമാനം ഉൾപ്പെടുന്ന രീതിയിൽ കൃത്യമായ ആംഗിളിൽ റിയാസ് അദ്ദേഹത്തിന്റെ ചിത്രങ്ങൾ പകർത്തി നൽകി. ഫോട്ടോ കണ്ടതോടെ ആ യാത്രക്കാരന്റെ മുഖത്തുണ്ടായ ചിരി റിയാസ് തന്റെ വീഡിയോയിൽ പകർത്തിയിട്ടുണ്ട്. ‘ഡൽഹി ഡയറീസ്’ എന്ന ക്യാപ്ഷനോടെ അദ്ദേഹം പങ്കുവെച്ച ഈ വീഡിയോ നിമിഷങ്ങൾക്കുള്ളിലാണ് വൈറലായത്. മറ്റൊരാളുടെ സന്തോഷത്തിന് കാരണക്കാരനാകാൻ എല്ലാവരും ശ്രമിക്കണമെന്ന സന്ദേശമാണ് ഈ ക്രിയേറ്റർ നൽകുന്നത്. നിരവധി പേരാണ് റിയാസിനെ അഭിനന്ദിച്ചുകൊണ്ട് കമന്റ് ബോക്സിലെത്തിയത്.
