വാഷിംഗ്ടൺ: ഇറാനിലെ സൈനിക നേതൃത്വം പൂർണ്ണമായും തുടച്ചുനീക്കപ്പെട്ടെന്നും ഇറാന്റെ പരമോന്നത നേതാവായിരുന്ന അന്തരിച്ച ആയത്തുള്ള അലി ഖമേനിയുടെ മകനും പുതിയ പരമോന്നത നേതാവുമായ മൊജ്തബ ഖമേനി “90 ശതമാനവും തീർന്ന” അവസ്ഥയിലാണെന്നും അവകാശപ്പെട്ട് യുഎസ് പ്രസിഡന്റ് ഡൊണാൾഡ് ട്രംപ്. യുഎസും ഇറാനും തമ്മിലുള്ള സൈനിക ഏറ്റുമുട്ടൽ അതിരൂക്ഷമായി തുടരുന്നതിനിടയിലാണ് ട്രംപിന്റെ ഈ നിർണ്ണായക വെളിപ്പെടുത്തൽ.(Donald Trump Claims Mojtaba Khamenei Is Ninety Percent Gone Amid US Iran Conflict)
അഭിമുഖത്തിലാണ് ട്രംപ് ഇക്കാര്യം വ്യക്തമാക്കിയത്. യുഎസും ഇസ്രായേലും സംയുക്തമായി നടത്തിയ വ്യോമാക്രമണങ്ങളിൽ ഇറാന്റെ പ്രതിരോധ സംവിധാനങ്ങൾ പൂർണ്ണമായും തകർന്നതായി അദ്ദേഹം പറഞ്ഞു. “ഇറാന് ഇപ്പോൾ നാവികസേനയോ വ്യോമസേനയോ ഇല്ല, അതെല്ലാം തകർത്തു. അവരുടെ വ്യോമപ്രതിരോധ സംവിധാനങ്ങളും ഇല്ലാതായി. പ്രധാന നേതാക്കളെല്ലാം കൊല്ലപ്പെട്ടു,” ട്രംപ് അവകാശപ്പെട്ടു.
കഴിഞ്ഞ ഫെബ്രുവരിയിൽ കൊല്ലപ്പെട്ട അലി ഖമേനിയുടെ പിൻഗാമിയായി പരമോന്നത പദവിയിലേക്ക് പരിഗണിക്കപ്പെട്ട മൊജ്തബ ഖമേനിക്ക് യുഎസ് വ്യോമാക്രമണത്തിൽ ഗുരുതരമായി പരിക്കേറ്റിരുന്നു. നേരത്തെ നടന്ന പ്രമുഖ നേതാക്കളുടെ ശവസംസ്കാര ചടങ്ങുകളിൽ നിന്നും അദ്ദേഹം വിട്ടുനിന്നിരുന്നു. ഈ പശ്ചാത്തലത്തിലാണ് മൊജ്തബ ഖമേനിയുടെ ആരോഗ്യത്തെക്കുറിച്ചുള്ള സൂചന ട്രംപ് നൽകിയത്. ഹോർമുസ് കടലിടുക്കിന്റെ പൂർണ്ണ നിയന്ത്രണം ഏറ്റെടുത്ത് അവിടെ ഉപരോധം ഏർപ്പെടുത്തുമെന്നും ഈ പാതയിലൂടെ കടന്നുപോകുന്ന കപ്പലുകളിൽ നിന്ന് സുരക്ഷാ ചാർജായി 20 ശതമാനം നികുതി യുഎസ് ഈടാക്കുമെന്നും ട്രംപ് വ്യക്തമാക്കി. എന്നാൽ ട്രംപിന്റെ ഈ നീക്കത്തിനെതിരെ ഇറാൻ വിദേശകാര്യമന്ത്രി അബ്ബാസ് അരാഗ്ചി ശക്തമായി രംഗത്തെത്തി. ഹോർമുസ് കടലിടുക്കിന്റെ യഥാർത്ഥ കാവൽക്കാർ ഇറാനാണെന്നും അത് എക്കാലവും അങ്ങനെ തന്നെയായിരിക്കുമെന്നും അദ്ദേഹം തിരിച്ചടിച്ചു.
Story Summary
US President Donald Trump claimed that Iran’s military leadership has been decimated, stating that late Supreme Leader Ali Khamenei’s son, Mojtaba Khamenei, is “90% gone.” As military conflict intensifies, Trump announced plans to impose a maritime blockade and a 20% security fee on ships in the Strait of Hormuz, a move strongly rejected by Iranian Foreign Minister Abbas Araghchi.
